Giro bikaina Arditurrin

Bisita gidatuak doan izan ziren. /
Bisita gidatuak doan izan ziren.

Interpretazio Zentroaren X. urteurrena ospatzeko ere aprobetxatu dute

GARAÑO OIARTZUN.

Atzo zazpigarrenez egin zuten Arditurri eguna meatzeen inguruan eta hainbat izan ziren bertaratutakoak. Asko autoz iritsi ziren arren, baziren eguraldi ona aprobetxatuz, bizikletaz edo oinez joaten animatu zirenak ere.

Egitarau zabala zuten prestatuta antolatzaileek eta familia giro ederrean igaro zuten igande goiza bertara azaldu zirenek. Goizean goizetik hasi ziren bisitariak hurbiltzen eta argazki-erakusketa inaguratu zuten. Bertan argazki zaharrak ikusteko aukera egon zen: meategietako langileak nola lan egiten zuten, zein materialekin, zein egoeratan... Bertaratutako herritarrak sorpresa aurpegiarekin irteten ziren eta batzuk baita gehiago jakiteko gogoz ere. Erakusketa urrira arte egongo da ikusgai. Hegazti-askatzeak arrakasta handia izan zuen. Eguerdian izan zen eta Igeldoko Arrano Etxean sendatutako bi hegazti askatu zituzten. Zentroko langilea ikusleekin elkartu zen eta oinez goruntz abiatu ziren. Leku lau eta garbi batera iritsi zirenean, zenbait azalpen eman zituen eta bertaratutakoen galderak erantzun ondoren, hegaztia askatu zuen eta nola joaten zen ikusi zuten.

Goiz osoan zehar bisita gidatuak izan ziren meatzeetan barrena. Dohainik izan ziren Interpretazio Zentroaren urteurrena zela eta, eta jendea oso pozik ateratzen zen bertan ikusitako gauzekin. Emarriren erakustaldiak ikusmira handia sortu zuen eta batzuek aipatu zutenez, lehenengo aldia zen horrelako gauza bat ikusten zutela. «Neskak dira denak, gainera eta sekulako harri handia mugitzen dute» zioen herritar batek. Haurrek ere igandea gozatzeko aukera eduki zuten. Batetik, Abaraxka ludotekakoek haur jolasak antolatu zituzten gerturatzen ziren txikienentzako. Antzinako jolasak erabiltzeko aukera izan zuten lehenik eta gero, erronkan parte hartzeko aukera eduki zuten.

Contenido Patrocinado

Fotos

Vídeos