Girizia Mendi Taldearekin Trianoko mendien zeharkaldia, apirilaren 7an

Bizkaian barrena ibiliko dira Oiartzungo mendizaleak. /  GOIZARIN
Bizkaian barrena ibiliko dira Oiartzungo mendizaleak. / GOIZARIN

GOIZARIN OIARTZUN.

Girizia Mendi Elkarteak apirilaren lehen iganderako irteera erakargarria antolatu du. Mendi zaleek, hortaz, badute aukera polita Trianoko mendiak zeharkatzeko oinez. Bizkaian dagoen Grumerango mendigunea Europako burdin meatzerik garrantzitsuenetakoa izan zen XIX. mendean. Gaur egun, mendi horietan meatzeen ondorioz, oso paisaia berezia sortu da.

Goizeko 07:30ean jarri dute hi-tzordua Haurtzaro Ikastolako aparkalekuan, autobusez Bizkaira gerturatzeko. Behin dena prestatu ondoren, Oiartzungo mendizaleek zeharkaldi hau egingo dute oinez: Pastores 680m-Galdanes 717m-Pico Mayor 742m-Ganeran 822m-Gasterantz 801m-Pico de la Cruz 803m Peñas Negras ingurumen interpretazio zentrotik abiatuta, Zuhaiztieta-La Arboleda parajean. Bost orduko ibilbidea aurreikusi dute antolatzaileek, hamaiketakoa barne.

Irteera honetan parte hartu nahi izanez gero, 20 euroren truke (autobusa), Garmendi txokolategira jo daiteke, baita online ere. Izena ematerakoan 10 euro aurreratu beharko dira.

Girizia Mendi Taldeak 2019an antolatzen duen laugarren ibilaldia da apirilekoa, urte berria proiektu ugariekin hasi du eta Oiartzungo mendi taldeak. Dagoeneko aurtengo programa banatu du herriko mendizaleen artean. Besteak beste, hamabi irteera egingo dituzte urtean zehar, arrakasta osoz. Ikusi besterik ez dago, zenbat lagun biltzen den haien ibilaldietan.

Maiatzean, Aralar aldera

Maiatzean, Aralar mendizerran zeharkaldia egingo dute oiartzuarrek. Larraitzetik abiatu eta Gañeta (1.323m), Malkorri (1.329m), Ganbo (1.413m), Uarrain (1.344m) eta Pardarri (1.396m) mendiak ezagutuko dituzte. Albiko aparkalekuan emango diote amaiera egun pasa ederrari.

Ekaineko ibilaldia asteburuan egingo dute. Pirinioetara inguratuko dira eta Somport-Lescun zeharkatuko dute, Camille izeneko bidea jarraituz. Uztailean ere bi eguneko irteera iragarri dute, berriz ere Pirinioetara. Taillon-Gabietos izeneko mendi puskak igoko dituzte, hiru mila metroko tontor aski ezagunak. Sarradets aterpean pasako dute gaua.

Negu Festa, azaroan

Irailean egun pasa egingo dute, Bizkaia aldean. Muruatik abiatu, Gorbeia (1.482m) igo eta Baratzar aldera jaitsiko dira oiartzuarrak. Urrian, berriz, Araba aldera joko dute eta Izki parke naturala bisitatuko dute. Han, Apinaizetik abiatu eta San Cristobal-San Justi (1.028m) zeharkatu ondoren Korresen amaituko dute egun pasa zoragarria.