Gaur ere tren berdean Arditurrira

Arditurriko bidegorriaz gozatzeko aukera paregabea. /  KOXKO
Arditurriko bidegorriaz gozatzeko aukera paregabea. / KOXKO

Hiru irteera-txanda eskaintzen ditu trenak asteazkenero, 10:00etan, 11:15ean eta 16:00etan

KOXKOOIARTZUN.

Udan zehar ihesaldi txiki bat egin nahi duenarentzat Oiartzungo paraje naturaletan murgiltzeko plan ezin hobea proposatzen du Arditurri parketxeak. Arditurriko Meatze gunera Tren Berdean joateko aukera eskaintzen du prezio murriztuan, uztaila eta abuztuko asteazken orotan. Hiru irteera-txanda eskaintzen ditu trenak asteazkenero. Goizeko 10:00tan lehena, 11:15etan bigarrena eta 16:00etan azkena.

Elizaldetik abiatuko da, Doneztebe plazatik. Paisaia zoragarriez gozaraziko duen 45 minutu inguruko ibilbide atsegin bat egingo du Oiartzungo naturgunean murgilduz. Oiartzun ibaiari jarraituz eta Aiako Harria aurrean dela, garai batean Arditurritik ateratzen zen mea Pasaiako porturaino garraiatzeko trenbide zaharra, egun Bide Berdea dena, bidelagun izango du trenak. Azken zatian, Aiako Harria Parke Naturalean sartuko da.

Behin Arditurrira iritsita, Interpretazio Zentroa bisitatzeko aukera dago. Garai batean laborategia izan zen eraikinean kokatzen da eta Aiako Harria Parke Naturalaren historian sakonduz, eboluzio geologikoa aztertzen da bertan. Jarraian, bisitariek kaskoak jantzi eta meazuloan sartzea da plana. 180 metroko pasabidean barneratuz, iluminazio eta soinu jokoek giro magikoa sortzen dute.

Doneztebe plazara

Esperientzia ahaztezin hau borobiltzeko, bisitaria trenean itzuliko da Doneztebe plazara, irteera-puntu berdinera, alegia. Eta behin Oiartzunen egonda, ezin galdu bertako gastronomiaz gozatzeko aukera.

Prezioa Trena & Arditurri: Helduek 10 euro; 5-12 urte artekoek, 65 urtetik gorakoek edo 10 lagun baino gehiagoko taldeek 8 euro; 1-4 urte arteko haurrek 3 euro. Nola iritsi: Donostiatik - Oiartzunera autobusean: E02 linea 20 minuturo; Donostia edo Hendaiatik Oiartzungo Arraguako geltokira Euskotrenen (TOPOA): 15 minuturo. Erreserbak: Errenteriako Turismo Bulegoa, Madalen kalea, 3. 943 494 521; turismoa@oarsoaldea.eus; www.arditurri.com edo www.oarsoaldeaturismoa.eus.