Euskal Herriko pala txapelketa irekiko bederatzi partida asteburu honetan

Ormaetxea, Txoperena, Maiz, Lekuona, Landa. Makurtuta, Aranjuelo, Urbieta, Berho eta Goñi. /  GOIZARIN
Ormaetxea, Txoperena, Maiz, Lekuona, Landa. Makurtuta, Aranjuelo, Urbieta, Berho eta Goñi. / GOIZARIN

GOIZARIN

Pasa den asteburuan Euskal Herriko pala txapelketako hamaika partida jokatu ziren Madalensoro pilotalekuan. «Bizpahiru neurketa baztertuta, beste guztiak onak, orekatuak eta emozio handikoak izan ziren», adierazi du Martxel Toledo antolatzaileak. «Lehenengo mailari dagokionez, lau partida jokatu ziren eta besteak beste, aipagarria izan zen Irigoien eta Almadoz bikote nafarrak 25 eta 24 irabazitakoa Arrizabalaga eta Lizarralde bikotearen aurka. Partida luzea eta erritmo handiz jokatua, azken momentuan, polemika barne, epailearen hanka sartze baten ondorioz erabaki zena», gaineratu du. «Lehenengo mailako gainontzeko partidak ere onak izan ziren, bukaerako ahaleginean hainbeste orekarik ez ikusi arren».

Bigarren mailan, berriz, hiru partida jokatu ziren eta Txoperena-Ormaetxea, Berho-Goñi eta Luixa-Luluaga bikoteek beren lana ongi bete ondoren ez zuten arazorik izan Landa-Lekuona, Urbieta-Aranjuelo eta Kasper-Amiano bikoteak mendean hartzeko.

Azkenik, hirugarren mailari dagokionez, lau partida jokatu ziren pasa den asteburuan Madalensoron eta Lozano-Ferreiro, Garbizu-Martinez, Bidegain-Ojer eta Gurrutxaga-Arrieta bikoteek lortu zuten garaile izatea Arruti-Esoain, Iraola-Laamirni, Ekain-Silanes eta Pujana-Pagoagaren kontrako partidetan.

Hona hemen emaitza guztiak zehatz-mehatz: hirugarren mailan, Lozano-Ferreiro 25-19 Arruti-Esoain; Garbizu-Martinez 25-24 Iraola-Laamirni; Bidegain-Ojer 25-08 Ekain-Silanes; Pujana-Pagoaga 14-25 Gurrutxaga-Arrieta. Bigarren mailari dagokionez, Txoperena-Ormaetxea 25-18; Urbieta-Aranjuelo 17-25 Berho-Goñi; Luixa-Luluaga 25-12 Kasper-Amiano. Eta lehenengo mailan, Irigoien-Almandoz 25-24 Arrizabalaga-Lizarralde; Arregi-Erleaga 25-16 Larralde-Zapiain; Errasti-Urdanpilleta 25-20 Inda-Gastesi; Arriaga-Unda 25-11 Leonardo-Madariaga.

Eta asteburu honetan ere izango dira partidak Madalensoron, bederatzi hain zuzen ere. Interesatuek larunbat goiz eta arratsaldez eta igande goizean gerturatu beharko dute. Beti bezala, sarrera doan izango da.