Euskal Herriko III. Boteluze txapelketak baditu finalistak

Gipuzkoa Bateko taldeak eskuratu zuen finalerako txartela. /  GARAÑO
Gipuzkoa Bateko taldeak eskuratu zuen finalerako txartela. / GARAÑO

Partida gaur jokatuko da Oiartzunen arratsaldeko 17:30ean, Bizkaia eta Gipuzkoa baten artean

GARAÑO OIARTZUN.

Pasa den asteburuan jokatu ziren boteluzeko semifinalak Oiartzungo Beko Plazan eta honekoak izan ziren partiden emaitzak. Ostiralean, hilak 28, jokatutako partidan Bizkaiak 6 eta 14 galdu zuen Iparralderen aurka. Larunbatean, aldiz, Gipuzkoa bik 3-6 galdu zuen Gipuzkoa baten aurka. Beraz, finala Bizkaia-Gipuzkoa bat izango da.

Hain zuzen ere, finala gaur jokatuko da Oiartzunen, arratsaldeko 17:30ean. Egun horretako egitaraua honakoa da: Beko Plazan 17:30tan Bote Luzeako Finala, Bizkaia-Gipuzkoa bat; 18:45tan sari banaketa; 19:00tan Kontzejupean, buruz buru Iñarra-Salaberria. 20:00tan Udaletxeko Pleno aretoan 'Pilota Oiartzunen' liburuaren aurkezpena.

Egileak Antton Kazabon, Anton Mendizábal, Joxemari Mitxelena eta Joxan Unsain. Ondoren, video emanaldia Pilotasorotik Madalensorora Mikel Mendizabalek egina.

Gainera, Oiartzungo Txost taldeak azaldu duenez, Euskadiko Pilota Federakundeak antolatu zituen aurreko bi txapelketak. Aurten ordea, Federakundeak, batzar orokorrean izandako arazoen ondoren, bertan behera utzi ditu bere ardurapean dauden antolakuntza guztiak, Bote Luzeako txapelketa barne.

Berreskuratze prozesu betean dagoenez Bote Luzea Euskal herri osoan (datorren urtean Arabak ere talde bat izango du) Oiartzungo Txost Taldeak arriskutsua zela aurten txapelketarik ez jokatzea iritzita, berak hartu du antolamenduaren eta finantzaketaren ardura, Oiartzungo Udalaren laguntzarekin, eta Federakuntzaren onespenarekin.

Arrakasta Europan

Txapelketa normalitate osoz jokatu da, eta joko-maila asko ari dela hobetzen ikusi da. Azkeneko Europako txapelketan(Holandan) izandako emaitzak ere hori erakutsi digute. Adibide bezala, Lapurdiko Pantxoa Hospital pilotariak, Belgikan profesional bezala jokatzeko eskaintza jasoa du, eta belgak (une honetan munduko Bote Luzeako talde eta jokalari profesional onenak dituztenak) asmoak azaldu dituzte Euskal Herrira etortzeko eta 'ojeadore' lanak egiteko. Harrituta daude bote luzeak izandako arrakastarekin eta oso pozik agertu dira.

Contenido Patrocinado

Fotos

Vídeos