Ergoiendarrak sanantoniyoak ospatzen ari dira

Bertso poteoa egin zen atzo, Alaia Martin eta Ander Lizarralde bertsolari oiartzuarrekin

GOIZARINOIARTZUN.

Pasa den asteburuko ekitaldiak burutu ondoren, atzo izan zuten jarraipena Ergoien auzoko sanantoniyoak. Izan ere, arratsalde partean lehertu zen festa, lehen suziria bota baitzuten Auzokalte inguruan. Gero, meza ospatu zen Auzokalten, auzoko hildakoen alde. Horren ondoren, bertso poteoak hartu zuen festaren lekukoa, Alaia Martin eta Ander Lizarralde bertsolari oiartzuarrekin.

Gaur, berriz, arratsaldeko 20:00etan Auzokalte paretik abiatuko da Kartelada ibiltaria, urrun diren senide eta lagunak gogoratzeko. Gaueko 22:00etan, berriz, sari mundialak jokoan dituen Truk txapelketa izango da Auzokalte elkartean (izen ematea 21:45ean itxiko da).

Bihar, goizeko 10:00etan goiz eresia izango da Lartaungo txistularien eskutik. Aldi berean, Ergoiengo V. Ganadu eta Artisau azoka zabalduko da Uztapide/Urtxalle plazan. Jatekoak eta edatekoak egongo dira, baita talo mundialak ere.

Goizeko 12:00etan, dantzari txikien erakustaldia hasiko da, plazan bertan. Eta 14:00etan, auzo bazkaria ospatuko dute Auzokalte Elkartean, bakoitzak etxetik ekarritakoa elkarbanatuz.

Arratsaldeko 16:00etan, haur jolasak, buruhandiak eta zezen ttikiak eta pottokak, gaztetxoen gozamenerako. Eta 19:00etan, Danborrada aterako da Pakitik eta Auzokaltera bitartean ibiliko da. Segidan, bertso afaria antolatu dute Sebastian Lizaso eta Andoni Egañaren eskutik, Auzokalte elkartean. Eta egunari amaiera emateko, DJ sorpresa auzoko gazteen eskutik.

Pilota partidak eta segalariak

Igande goizean, goiz eresia ez da faltako Herri Musika Eskolako ikasleen eskutik. Gero, gaztetxoen pilota partidak hasiko dira. Eguerdi aldean, Amulleta Danborraren Kofradia auzoko giroa alaitzen ibiliko da. Eta 14:00etan auzotar guztientzat bazkaria zerbitzatuko dute Auzokalte Elkartean auzoko tabernek eskainitako menuekin. (Txartelak Tolare jatetxean salgai egongo dira).

Arratsaldean, berriz, Otxamantegiko Urtzi, Bidarteko Iker eta Pikabeko Aitor segalariak eta Xaguerrekako Ttakalo, Jon Larrañaga, Axel Larrañaga eta Markel Zapirain aizkolariak lanean ikusteko parada izango da. Eta horien ondoren, zezensuzkoa eta azken suziriarekin ergoiendarrek aurtengo festei emango diete akabera.

Guztientzako moduko egitaraua antolatzen saiatu da Ergoiengo festa batzordea aurten