Elizalde Eskolako abesbatzak hamar urte bete ditu

Elizaldeko Oihartzuna osatzen duten gaztetxoak. /  GOIZARIN
Elizaldeko Oihartzuna osatzen duten gaztetxoak. / GOIZARIN

GOIZARIN OIARTZUN.

Elizaldeko Oihartzuna, Elizalde eskolako abesbatzak, kontzertu aparta eskaini zuen joan den ostiralean Udal Areto Nagusian, hamargarren urteurrena ospatzen duen ikasturte honetan. 2008-09 ikasturtean musika arlotik sortu eta abian jarri zen eta orduezgero 8-12 urte bitarteko ehundaka ikaslek parte hartu dute eskola orduz kanpoko jarduera horretan.

«Aurten ere LH eta DBHko neska-mutilez osatutako talde ederra dugu, abesbatza munduan hain ezaguna den Imanol Elizasuren zuzendaritzapean», adierazi du Andoitz Apaolaza, Elizalde Herri Eskolako zuzendariak. «Oraingoan ere bikain bete du bere lana, koru zuzendaritza esparruan ibilbide luze eta esperientzia handiko irakaslea baitugu Imanol eta», gaineratu du. «Munduko kultura eta estilo ezberdinetako musika eginez gozatzeaz gain, ahots emisioaren lanketa eta eszena lanak bereziki garrantzia dute saio horietan», nabarmendu du.

Eskolaren eguna, gaur

Ikasturte amaiera gerturatzen ari dela eta, urtero bezala, maiatzeko hirugarren igandean Elizalde Herri Eskolak bere eguna ospatuko du. Ekintza mordoa izan ohi da, ikusteko eta parte hartzeko. Goizeko 09:30ean Diana ospatuko dute trikitilariekin; jarraian, 09:45ean krosa. Horren ondoren, eskolako ateak zabalduko dituzte familientzat; 'Hitz bat, Mila irudi' proiektuaren barruan, aurten Xabier Leteren 'Kontrapas' abestiaren inguruan egin dituzten lanak egongo dira ikusgai. Ordu berean, Judo erakustaldia eta xakea hasiko dira. Eta 11:00etan, gimnasia erritmikoa eta hip-hopa; 11:30ean Euskal dantza.

Eskolaz kanpoko ekintzekin amaitu ondoren, 12:00etan emanaldi nagusia izango da. DBH4koen agurra eta HH2koen ongietorriarekin emango zaio hasiera. Jarraian zikloz-ziklo, talde bakoitzak prestatu duen dantza saioa aurkeztuko du. Eguraldiak lagunduko ez balu, Elorsoro kiroldegian eskainiko dira dantza emanaldiak. Ekitaldia amaitu eta bazkariaren txandak izango dira, lehenengo txikiak eta jarraian helduak. Aurten «bazkalosteko kantu saioa antolatu dugu lehen aldiz». Eta 14:30ean haur jolasak hasiko dira, DBHko gazteek antolatuta; eta 17:00etan Dantzaldia DJ Mikeltxiren eskutik. Goiz eta arratsaldez puzgarriak eta tailer txikiak ere egongo dira haurren gozamenerako.