Ekitaldiz jositako Baserritar eguna gaur

Herriko ttikiek zezen txikiarekin gozatu ahal izan zuten Beheko plazan. /  ARGAZKIAK ARIZMENDI
Herriko ttikiek zezen txikiarekin gozatu ahal izan zuten Beheko plazan. / ARGAZKIAK ARIZMENDI

Atzo xanistebanetako egun handia ospatu zen, eta sokatira eta joko garbi txapelketak, pilota partidak eta kontzertu herrikoia izan ziren

GARAÑO OIARTZUN.

Oiartzungo Xanistebanak aurrera doaz eta atzo oiartzuarrek haien egun handia ospatu zuten. Goizeko eguraldi apartarekin herritar ugari bildu zen Herri Meza Nagusian, Doneztebe parrokian. Zaindariaren eguneko meza Lartaungo eta Parrokiako abesbatzaren laguntzarekin eman zuen apaizak. Organo-jotzailea, beste behin ere, Begoña Bergaretxe oiartzuarra izan zen.

Goizean zehar, meza nagusiaz gain, Lartaun txistulari taldearen kontzertu herrikoia izan zen Kontzejupean. Bertaratutakoak oso gustura atera ziren handik. Txalo zaparrada ederra jaso zuten guztiek entzuleen aldetik. Garai bertsuan, Beheko plazan, herriko ttikiek zezen txiki eta poniekin gozatu ahal izan zuten.

Arratsaldean kirolak hartu zuen protagonismo handiena. Auzoen arteko sokatira, joko garbi, bote luze eta pilota partidak ikusteko parada izan zutela oiartzuarrek. Gainera, euskal pilota egokituko erakustaldia ere izan zen herrian. Gipuzkoako IV. Eskuz pasakako txapelketa ere jokatu zen eguerdiko 13etan eta ia bi orduko partida jokatu ondoren Eneko Maiz eta Unai Alvarez Gipuzkoako txapeldun berriak dira 13-11 irabazi ondoren, gaur arte txapeldunak izan direnei, Jon Urbieta eta Andoni Urbietari.

Malen eta Ekain Elizasu anai-arrebek kontzertu lasaia eman zuten atzo Landetxe plazan

Musikak ere ez zuen huts egin. Arratsaldeko 18:30etan Malen eta Ekain Elizasu anai-arrebek kontzertu lasaia eman zuten Landetxe plazan. Gauean, Bide Batez taldearen erromeri mundiala izan zen plazan denen gozamenerako eta Landetxen, berriz, Koban eta Liher musika taldeen kontzertua.

Idi demak, azoka, bazkaria...

Gaur Oiartzunen Baserritar Eguna ospatuko da egitarau zabalaren baitan. Idi Dema, Zaharren egoitzarako bisitaldia, Oiartzungo produktu ekologikoen azoka, sagardo lehiaketa, pintxo lehiaketa, bazkari goxoa herriko erretiratuentzat... Denetik izango da; hortaz, era guztietako ekitaldiez gozatzeko aukera izango dute oiartzuarrek. Oiartzungo Asablada feministak ere egun honetarako zenbait ekitaldi antolatu ditu. Hala nola, bazkari feminista Landetxeko plazan eta Poteo-Jira feminista arratsaldeko 19:30etan.

Arratsaldean, idi demaren bigarren txanda izango da hilerriko goiko plazan. Helduen tailerretakoek ere erakusketa jarriko dute Kontzejupean eta bertan urtean zehar egindako eskulanak, joste-lanak edo bolilloak erakutsiko dituzte. Herriko erraldoi eta buruhandiek ere kale-buelta topaketan parte hartuko dute eta inguruko herrietako erraldoi eta buruhandiak ikusteko aukera egongo da bertan. Herri kirolen jaialdia ere egingo da aurten Haurtzaro Ikastolako plazan.

Ilunabarrean Haurtzaro Dantza taldearen eta Oiartzungo Flauta taldearen emanaldia izango da Doneztebe plazan eta Elorsoro kiroldegian Alur dantza taldeak bere Irradak emanaldia eskainiko du. Gauean, Landetxe plazan Dj gaua izango da 23etan hasita eta plazan, berriz, Yakolev eta Piperrak. Helduen danborrada ere baserritar egunean izaten da, hain zuzen ere gaueko 23:30ean.

Contenido Patrocinado

Fotos

Vídeos