Eguraldi txarrak ez ditu Arraguako festak zapuztu

Arraguako kideek Sarriegiren doinuak primeran jo zituzten. / GOIZARIN
Arraguako kideek Sarriegiren doinuak primeran jo zituzten. / GOIZARIN

GOIZARIN OIARTZUN.

Arragua auzoko festak aurreko igandean amaitu ziren eta bertako jai batzordeak egin du dagoeneko lehenengo balorazioa. «Eguraldiak asteburu honetan ez digu asko lagundu baina hala ere Festa Batzordeko kideok oso gustura gaude. Parte hartze ona izan da aurtengoa», adierazi du Joxe Mari Gezalak. Esate baterako, hilaren 10ean jokatu zen truk txapelketan 40 bikotek eman zuten izena. Egun berean, Gorriti show-ean «gaztetxo ugari bildu zen». Bertso-afaria ere ongi burutu zen Aldeguna elkartean Maialen Lujanbio eta Sebastian Lizaso bertsolariekin. Elkarteko kideek afari gozoa prestatu zuten bertsozaleentzat eta giro ona nagusitu zen saioan.

Asteburu honetan, berriz, eguraldia euritsua izan da protagonista. Hala ere, aurreko ostiralean Elektro txarangak denak dantzan jarri zituen. Larunbatean, Haurtzaro dantza taldearen saioak «oso gustura utzi zuen jendea». Gero, auzotarrak frontoian bapo bazkaldu ondoren, bingoa, sarien zozketa... denetik izan zuten. Danborradak ere izan zuen jarraipena. Zuriz jantzita eta danborra soinean, auzotarrak gogor astindu zituzten euren makilak, Karen Muñoz eta Eider Mitxelena zuzendariei jarraituz. Aurten 40 lagun animatu dira danborradan parte hartzera.

Igandean festa gogoak jarraipena izan zuen. Auzotarren parte-hartzea bultzatu nahian, batukada tailerra antolatu dute eta arrakasta handia izan zuen. «Odei Astibia izan da gure maisu eta izugarri gozatu dugu». Era berean, IV. Bizkotxo lehiaketa egin zen, erantzun bikainarekin. June Intxaustik eraman zuen lehen saria.

Eguraldiak gehiegi lagundu ez badu ere egitaraua bete dute Arragua auzoan. Puzgarririk gabe geratu ziren auzoko txikiak baina «gainontzeko guztia burutzeko gai izan gara». Bejondeiela!