Ederki gozatzen ari dira Oiartzungo haur eta gaztetxoak

Atzoko flashmob grabaketa. /  GOIZARIN
Atzoko flashmob grabaketa. / GOIZARIN

GOIZARINOIARTZUN.

Udaleku irekiak hilaren 1ean hasi ziren eta 30a bitarte luzatuko dira. Parte hartzen ari diren haur eta gaztetxoak 3 urtetik LHko 6.maila bitartekoak dira. Goizero ederki pasatzen dute.

Aurten 500 haur eta gazte izan dira udalekuetan izena eman dutenak, horietatik zazpi, Oiartzunen, familia bolondresen ardurapean, uda igarotzera etorri diren sahararrak. 'Oporrak bakean' programaren bitartez etortzen dira eta Tindufeko (Aljeria) errefuxiatu guneetako uda gogorretik atera eta haien osasuna hobetzea dute helburu. Bide batez, bihar arratsaldean egingo zaie harrera, Landetxe Plazan.

2019ko udalekuek badute berezitasun bat, talde bakoitzak Oiartzungo emakume esanguratsu baten izena du. Emakume horien biografiak banatu dituzte txikien artean, eta tarteka, emakume horietako batzuk bisitan izango dituzte. Egitasmo honen helburua, haur eta gazteen artean emakume erreferenteak edukitzea da.

Udalekuetako lehenengo astean, taldekideak eta hezitzaileak elkar ezagutu eta berehala hasi ziren ekintzak egiten. Sarritan eguraldia eskasa izan arren, igerilekura joan ziren, jolasak egin zituzten eta aniztasun sexuala lantzeko parada izan zuten.

Aniztasun funtzionala lantzeko ginkana dibertigarri batekin eman diote hasiera aste honi. Igerilekura eta errekara ere joan dira irri artean, freskatzera. Atzo flashmob-a grabatu zuten Beheko Plazan.

Oraindik udaleku erdialdean gaudenez, ekintza ugari dituzte egiteke. Astero bezala igerilekura nahiz errekara joango dira, kantuan eta dantzan ibiliko dira eta jolasean jarraituko dute, altxorraren bila, ur-jolasetan, herri kiroletan...

Horrez gain, datorren asteko ostegunean elkartasuna lantzeari eskainiko diote eguna. Izan ere, El Watan taldeko kideekin batera Sahara Eguna antolatu dute. Bertako egoeraren berri edukiko dute eta hango jolas ezberdinetan arituko dira. Hori gutxi balitz, zirkuaren bisita izango dute azken astean. Azken aurreko eguna nahi bezala igaroko dute, haiek antolatutako eguna izango baita.

Ikusten den moduan, aurten ere ez dute aspertzeko betarik izango herriko haurrek. Goza dezatela, hortaz, Nekane Martiarenak, Garazi Morenok, Nora Velez Del Burgok eta begiraleek hainbeste mimoz prestatutako egitarau oparo horrekin.