Dantza Festa nagusi Oiartzungo bailaran, dantza bataloiarekin

Dantza estilo desberdinak ikusi ziren Doneztebe plazan. /  GOIZARIN
Dantza estilo desberdinak ikusi ziren Doneztebe plazan. / GOIZARIN

GOIZARIN OIARTZUN.

Atzo, dantza Bataloiarekin eman zitzaion hasiera Oiartzungo asteburuko Dantza Festari. Doneztebe plazak Kabaretaren antza hartu zuen ilunabar aldera eta dantza estilo ezberdinak ikusi ziren bertan: Flamenkoa, La Pulgarekin; Belly Dance, Leire Mendozarekin; Dance Hall, Pw Iararekin; Kizomba; Oiartzungo Funki neskak; Aereo Dantzak; Simetria Aire Akrobazia; Buto..., hantxe bildu ziren ikusleen gozamenerako.

Gaur, berriz, dantzatzea gustuko duten herritarrek klaseak hartzeko aukera izango dute Iturriotz auzoan dagoen Dorretxeko lokaletan. «Dantza klaseak eskainiko ditugu eta trukean jasotzaileak nahi duena emango digu. Izan ere, lortzen ditugun irabaziak Indiako The Shakti Project-era bidaliko ditugu», adierazi dute antolatzaileek. Horrela, Dantza Batailoiaren bidez, «haurtzaroarekin lotura zuzena duten gizarte proiektuak lagundu eta babestu nahi ditugu. Ekimen honen bidez, dantza publiko osoari gerturatu nahi diogu, dantza mota ezberdinak erakutsiz, eta dirua oztopo izan gabe», gaineratu dute. Hortaz, «klaseei zuk jarriko diezu prezioa, zuk eman ahal edo nahi duzuna ordainduko duzu», zehaztu dute. Argi dago ekimen hori gauzatzeko lanean aritu diren irakasle, dantzari, sukaldari edo teknikoek ez dutela inolako diru saririk jasotzen. «Gauza bakarra eskatzen dugu: ekarpen solidarioa egitea, eta antolaketak duen lana kontuan izatea».

Hona hemen gaurko egitaraua: 10:00etan: aurkezpena; 11:00etan: beroketa; 11:15etik aurrera: sabel dantza; flamenkoa eta pole dance-a, bakoitza bere gelan; 12:30ean: dantza patinetan eta garaikidea; 14:00etan: bazkari begetarianoa; 16:00etan: luzaketak; 16:30ean: dance hall eta euskal dantza; 17:45ean: samba-afrobrasildarra, break-popping; 19:00etan, musikala eta Kizomba; azkenik, 21:30ean, dantza mundiala, amaiera emateko.