Badatoz San Migel festak Ugaldetxo auzora

Giro ezin hobea izan ohi da Ugaldetxeko auzoko jaietan. /  GOIZARIN
Giro ezin hobea izan ohi da Ugaldetxeko auzoko jaietan. / GOIZARIN

GARAÑO OIARTZUN.

Gaur, hilak 28, hasiko dira Ugaldetxoko festak. Herriko auzoetako azkeneko festak dira eta asteburu honetan izango dira. Egitarau oparoa antolatu dute igandera bitarte. Ostiralean, arratsaldeko 18:30ean izango da festen hasiera eta ondoren elkarretaratzea izango da. Gaueko 22:00etan XL. Truk Txapelketa (karpan).

Hilak 29, larunbata izango da auzotarrentzat egunik handiena. San Migel eguna goizean goiz hasiko dute eta 09:00etan diana izango da. Ondoren meza eta 10:30etan duatloia. 11:00etatik 14:00etara talo festa egingo dute Laboren eta Yurrita errota bisitatzeko aukera egongo da. Kultura ondasun gisa, Monumentu izendapenaz, Euskal Kultura Ondarearen Zerrenda Nagusian dagoen Yurrita errotan ehotuko da ondoren Laboren taloa egiteko erabiliko den iriña. Eguerdian bertso bazkari mundiala izango da Alaia Martin, Jon Martin eta Arkaitz Oiartzabal Xamoarekin. Arratsaldean ere ez da girorik faltako auzoan. Matraka elektrotxarangak dantzan jarriko ditu auzotarrak arratsaldeko 19:00etan. 21:00etan Tony Rocketen kontzertua izango da eta gaueko 23:00etan Erromeria Ingo al deu-rekin.

Azken eguna igandea izango da eta dianarekin hasiko dute eguna. 11:00etan euskal dantzen emanaldia izango da eta baita muxikoak eta kotxe erakusketa ere. Eguerdiko 12:00etan tortilla txapelketa egingo dute eta arratsaldean Xomorro zirku-taldea izango da (Kalexa plazan). 18:00etan toka txapelketa eta festei amaiera emateko zezen suzkoa 19:30etan. Giro bikaina ziurtatuta dago aurten ere auzoan, ea jende asko azaltzen den.

Contenido Patrocinado

Fotos

Vídeos