Badator aurtengo garagardo feria

GARAÑO OIARTZUN.

Bihar irekiko ditu ateak aurtengo garagardo festak eta aurtengoa XIV. izango da. Urteroko zita garrantzitsuenetako bat izaten da urriko zubiko garagardo festa, eta herritarrak hasteko irrikaz egoten dira. Aurtengoa bihartik larunbatera arte izango da, Done Eztebe plazan.

Urte hontan hemezortzi garagardo ezberdin egongo dira Europa guztitik ekarritakoak: Alemaniatik, Txekiatik, Irlandatik, Belgikatik... Bertakoak ere izango dira, hain zuzen, Hernanikoa da aurten ekarriko dutena.

Horrez gain, janari eskaintza mundiala ere izango da. Urtero lez, kostilla, saltxitxak eta ukondoa eskainiko dira afaltzeko eta postrerako gazta edota goxoa. Gainera, kafea ere egongo dela aipatu dute. Izan ere, herriko zazpi tabernak 500 kaferentzako tiketak eman dizkiete festaren antolatzaileei, jan eta edatera doazenen artean banatzeko. Ordutegia 19:00etatik 01:00etara izango da egunero eta ostegunean pintxo-prost egingo dute. Haurrentzako ere puzgarriak eta txokolatada antolatu dute larunbaterako.

Zozketak

Beste urte betez, egunero zozketak egingo dituzte 22:00etatik 23:00etara. Euro baten truke eskuratuko dituzte txartelak garagardozaleek eta 60 sari egongo dira jokoan, herriko merkatarien eta ostalarien laguntzarekin: hogei gosari, arrain loteak, 28 afari, termatarako sei bonu, hainbat produktuk osatutako hamahiru lote, nekazaletxetan bi gau eta lau masaje.

 

Fotos

Vídeos