Artikutzan bi ibilbide gidatu egingo dituzte azaroan

Igande honetan, hilak 4an, eta 11n egingo dituzte irteerak

GARAÑO OIARTZUN.

Iganden honetan, hilak 4, irteera ornitologikoa antolatu dute Artikutzatik Pasatzen diren hegazti migratzaileak ikusteko. Ibilaldia Burnaiztegi eta Bianditz inguruan egingo dute. Elkartze puntua Artikutzako sarrera izango da, hau da, Eskaseko atezaindegiko aparkalekua, goizeko 9:15ean eta amaiera 13:30 inguruan. 6 urtetik beherakoentzat dohainik izango da. 6-16 urte bitartekoentzat 2,09 euro eta 16 urtetik gorakoentzat 3,14 euro.

Igandean egingo duten irteera hegazti migratzaileak ikusteko egingo dute. Artikutzako barrutia Pirinioek sortzen duten mendi katearen barne dago. Hegazti migratzaileek, euren ipar-hego mugimenduetan kate hori gainditu behar dute. Horregatik, Artikutzan dauden gainak oso aproposak dira hegazti migratzaileen begiraleentzat. Irteera honetan, Gonzalo Dean izango da azalpenak ematen, Gorosti Natur Zientzia Elkarteko kide eta hegazti migratzaileekin lanean diharduen aditua.

Berarekin Artikutzatik pasatzen diren hegazti migratzaileak behatzera joango dira bertaratutakoak. Ibilaldia Burnaiztegi eta Bianditz inguruan egingo dute, Eskasetik abiatuta. Gainetan geldialdiak egingo dituzte, pasatzen diren hegaztiak identifikatzeko. Haien ohiturak, bidaiak eta bitxitasunak ezagutzeko aukera paregabea izango da.

Binokularrak edo prismatikoak ekartzea gomendagarria da, baita haizea mozteko arropa ere, gainetan haizea latz jotzen du eta. Guztira 6 km inguru egingo dituzte 250 m desnibelarekin.

Bigarren ibilaldia azaroaren 11an egingo dute eta Beltzuntzako buelta egingo dute. Udazken bete betean gaude jadanik, eta zuhaiztiek koloreak aldatzen hasiak dira, hostoak galdu aurretik. Igande honetarako udazkeneko koloreez gozatzeko eta ibilaldi luzea egiteko aukera eskaini nahi dute Artikutzako kideek.

Artikutzako auzoan hasiko dira eta Elama errekako bailaran gora joango dira Beltzuntzako tontorreraino, barrutiko hegoaldeko mugarantz. Altuera dexente hartuko dute, kostata, baina sari gisa, bertatik bista zoragarriak izango dituzte. Hamaiketakoa hartu ondoren bueltari ekingo diote, oraingo honetan Urdallue errekako bailara

aldetik. Tartean larreak eta pagadiak zeharkatuko dituzte, poliki poliki Urdallueko bidetik Artikutzako auzora heldu arte. Ibilaldi hau ohikoa baino luzeagoa da, baita desnibela handiagoa ere. Hori dela eta, ura janaria eta zapata eta arropa egokiak ekartzearen gomendioa azpimarratu nahi dute. Guztira,14 km egingo dituzte eta 900m ko desnibela egongo da.

Antolatzaileek ohar batzuk plazaratu dituzte. Batetik, ibilbideak gaitasun fisikoak hobetzeko prestatuak ez daudela adierazi dute, baizik eta Artikutzan eskaintzen dizkigun

aberastasunez jabetzeko. Geldialdiak egingo dira ibilbidean zehar, ingurunea ezagutu, usaindu, ukitu, entzun eta paisaiaz gozatzeko, besteak beste; hamaiketakoa egiteko geldialdi teknikoa ahaztu gabe, noski! Ibilbide guztietarako mendiko botak eramatea gomendagarria dela gogorarazi dute eta makilak edo bastoiak maldetan lagungarriak direla. Gainera, zira edo txamarra eramatea aholkatzen dute, mendian eguraldi aldaketak maiz gertatzen baitira. Eguraldi txarra dagoen kasuetarako, aldatzeko arropa eramatea ere gomendatzen da. Jateko eta edateko zerbait eramatea komenigarria dela aipatu dute, auzoan kafe eta freskagarri makina besterik ez dago eta. Sortutako zabor guztia biltzea eskatzen dute. Azkenik, mendi bideak izan arren, zailtasun handirik ez dutela adierazi dute arazorik ez badago behintzat.

Informazio gehiagorako eta izena emateko honako web orrialdea bisitatu: https://

www.donostia.eus/ataria/web/ingurumena/natura-biodibertsitatea/artikutza/jarduerak edo telefono zenbaki honetara deitu: 620 337 875.

Gau beltza bertan behera

Arratsaldeko 20:00etan elkartzekoak ziren atzo Kontzejupean afari merienda egiteko. Baina eguraldia dela eta, hilerriko ibilbidea, suzko akerra, urduritasuna, iluntasuna, garraixiak, sua... eta beste hainbat ezusteko ezin izan zituzten egin. Pena handiz hartu zuten erabakia Abaraxkako hezitzaileek. Hori horrela izanik, ludotekak ohiko funtzionamendua edukiko zuen.

Contenido Patrocinado

Fotos

Vídeos