Arraguako auzotarrak jarri dira bigarren asteburuari begira

Arraguan futbolak badu arrakasta. / ARGAZKIAK: GOIZARIN
Arraguan futbolak badu arrakasta. / ARGAZKIAK: GOIZARIN

GOIZARIN OIARTZUN.

Arragua auzoko festak aurreko ostiralean hasi ziren, truk txapelketarekin. Guztira 40 bikote aurkeztu ziren eta aurreneko saria Jabier Aizpurua eta Jabier Ugaldebere bikote beteranoak eraman zuen; bigarren saria etxean geratu zen, Pako Moreno eta Joxemari Gezala bikoteak lortu baitzuen; eta hirugarren saria bikote gazte batek jaso zuen: Asier Retegi eta Asier Olaizola bikoteak. Bigarren aukeran ere lehia estua izan zen eta aurreneko saria Moñi eta Kotte Iparragirre ahizpek jaso zuten; bigarrena, Gorka Mitxelena eta Aitor Mitxelena bikoteak eta hirugarrena Felipe Mitxelena eta Imanol Elizondok.

Larunbatean, berriz, bertsozaleek ederki gozatu zuten Maialen Lujanbio eta Sebastian Lizasoren bertso sortekin. Eta igandean futbol txapelketak ere izan zuen arrakasta eta auzoko gaztetxoek izugarri gozatu zuten pista berrian.

Jubilatuen bazkaria

Arraguako festek ostiralean izango dute jarraipena. Arratsaldeko 14:00etan jubilatuak Aldeguna elkartean bilduko dira bazkari legea egitera. Gero, Aldeguna elkartearen atarian suziria botako dute Agurra dantzatu ondoren, arratsaldeko 18:00etan. Handik abiatuko da, jarraian, Kalejira koloretsua. Gero, 19:00etan, Gorriti show izango da, poney eta bigantxekin gaztetxoentzat. Jarraian, 20:00etan preso eta iheslarien aldeko elkarretaratzea izango da, frontoian hasita auzoan zehar. Afaltzeko aukera ere izango da, gosetzen direnentzat.

Azkenik, Elektrotxufla musika ibiltariarekin gozatzeko aukera izango da aspertu arte.