Arragua auzoko festak, urteko lehenak

Arraguako festa batzordeko kideek prestatutako festekin izango da non eta zertan gozaturik. /  GOIZARIN
Arraguako festa batzordeko kideek prestatutako festekin izango da non eta zertan gozaturik. / GOIZARIN

Aurten bi asteburutan izango dira, honetan eta hurrengoan

GOIZARIN OIARTZUN.

Arragua auzoan jai giroa nagusituko da ostiralean, hilak 10, festetan murgilduko baitira bertako auzotarrak. Herrian, urteko lehen jaiak dira Arraguakoak eta gustu guztietarako ekimenik ez da faltako bertan. Lehendabiziko asteburuan hiru ekintza izango dira: ostiralean, Truk txapelketa mundiala Aldeguna elkartean; larunbatean bertso-afaria Maialen Lujanbio eta Sebastian Lizaso bertsolariekin, elkartean bertan, eta igandean futbol txapelketa gaztetxoentzat pista berrian.

Hurrengo hitzordua hilaren 17an izango da. 14:00etan jubilatuak Aldeguna elkartean bilduko dira bazkari legea egitera. Gero, Aldeguna elkartearen atarian suziria botako dute, arratsaldeko 18:00etan. Handik abiatuko da jarraian kalejira koloretsua Lartaungo txistulariekin, dultzaineroekin, buruhaundiekin eta Oiartzungo Erraldoien konpartsarekin. Gero, 19:00etan, Gorriti show izango da, poney eta bigantxekin gaztetxoentzat. Jarraian, 20:00etan preso eta iheslarien aldeko elkarretaratzea frontoian eta gosetuentzat bertan afaltzeko aukera izango da. Azkenik, Elektrotxufla musika ibiltaria, aspertu arte.

Maiatzaren 18an, berriz, goizeko 10:00etan hasiko da festa giroa auzoan, trikitilarien dianarekin. Gero, Haurtzaro Ikastolako dantzarien ikuskizuna izango da frontoian. Oidultz dultzainero taldea ere ibiliko da auzoan zehar, doinu ederrekin bazterrak alaitzeko. Herri bazkaria ere ez da faltako, 14:00etatik aurrera. Egunak, ordea, emango du besterik. Zozketak, sariak, bingoa... Arratsaldeko 19:00etan auzoko artisten eskutik Danborrada izango da, Pasai txarangaren laguntzarekin. Gero, afaria eskainiko dute frontoian 5 euroren truke nahi duenarentzat. Azkenik, DJ XAB-arekin dantzaldia izango da... aspertu arte.

Maiatzaren 19an, igandean, izango da egunik handiena. Goizeko 09:00etan, meza. Gero, diana Oiartzungo Lartaungo txistulariekin. 10:30ean, pilota partidak Oiarperen eskutik. 11:00etan haur jolas parkea zabalduko dute eta 11:30ean haur jolasak hasiko dira. 12:00etan Batukada tailerra.

Arratsaldean berriz 15:30ean jolas parkea eta puzgarriak. V. Bizkotxo Lehiaketa izango da gero. Parte-har-tzaileek 17:00etarako etxean egindako bizkotxoak aurkeztu beharko dituzte eta epaimahaiak erabakiko ditu zein diren aurtengo hiru onenak. Horren ondoren, 'Kutxaka' ikuskizuna izango da haurrentzat. Azkenik, txokolate gozoa dastatuz eta zezensuzkoekin amaituko dituzte aurtengo festak.