Arizmendi eta Arbelaitz bikote oiartzuarrak emozioa sortu du Euskal Herriko pala txapelketan

Zutik, Arbelaitz, Arizmendi, Maiz epailea, Urteaga eta Vitoria. Makurtuta, Santamaria, Etxeberria, Salaberria eta Kazabon. / GOIZARIN
Zutik, Arbelaitz, Arizmendi, Maiz epailea, Urteaga eta Vitoria. Makurtuta, Santamaria, Etxeberria, Salaberria eta Kazabon. / GOIZARIN

Asteburu honetan bederatzi partida jokatuko dira Madalensoro n

GOIZARIN OIARTZUN.

Pasa den asteburuan, Euskal Herriko pala txapelketa irekiaren beste hamar partida jokatu ziren Madalensoron eta poliki-poliki argitzen doa sailkapenean zein bikotek egingo duten aurrera eta zeintzuk geldituko diren bidean.

Hamar partida horietatik, Arizmendi eta Arbelaitz bikote oiartzuarrak jokatutakoa izan zen orekatuena eta emozio handikoa, tanteoari dagokionez behintzat. Izan ere, Urteaga eta Vitoria bikotearen aurkako partidan oiartzuarrak ia partida osoan aurretik ibili ziren baina 24 eta 25 galdu zuten norgehiagoka serio eta txukun bat jokatu ondoren. Orain oiartzuarrek gelditzen zaien partida irabazi beharko dute aurrera egin ahal izateko.

Jokatutako beste bederatzi partidetan, berriz, ez zen inolako ezustekorik gertatu, izan ere bikote faboritoek euren partidak aurrera atera zituzten indar erakustaldia eginez. «Faboritoez mintzatzeko azkarregia den arren, dagoeneko badira horretarako gai direla kantxan demostratu duten bikoteak, besteak beste, lehen mailako iazko txapeldunak, Salaberria eta Huegun bikotea eta bigarren mailako Berho eta Goñi, biak ala biak maila ona erakutsiz berriro txapelak lortzeko bide onean daudela erakutsi dutelako», adierazi du Martxel Toledo txapelketaren antolatzaileak.

Hona hemen aurreko larunbatean burututako partiden emaitza guztiak: 3. Mailan, Urteaga-Vitoria 25-24 Arizmendi-Arbelaitz; Kazabon-Salaberria 06-25 Santamaria-Etxeberria; Maneiro-Aizkorreta 20-25 Iribar-Iribar; 2. Mailan, Berho-Goñi 25-15 Aranburu-Telletxea; Luixa-Luluaga 25-13 Etxenike-Ibarra; San Sebastian-Lizaso 17-25 Landa-Lekuona; Andueza-Rodriguez 25-13 Zabala-Arriaga; 1. Mailan, Antxordoki-Martikorena 25-15 Elejalde-San Miguel; Salaberria-Huegun 25-15 Aroztegi-Zubimendi; Ubeda-Zumeta 25-13 Leonardo-Madariaga.

Eta asteburu honetan ere izango dira partidak Madalensoron, bederatzi hain zuzen ere. Interesatuek larunbat goiz eta arratsaldez eta igande goizean gerturatu beharko dute. Beti bezala, sarrera doan izango da.