Gazte-Kemena Abesbatzak 25 urte beteko ditu aurten

M.P. ERRENTERIA.

Xabier Vesga zuzendariaren eskutik 1994. urtean jaio zen Gazte-Kemena abesbatza eta aurten 25 urte betetzen dituela-eta, bere kideek urte berezia izan dadin nahi dute. Horregatik, urtero Ereintza Elkarteak antolatzen duen Gipuzkoako Gabon Abesti lehiaketan, aurtengoan bereziki noizbait abesbatzan abestu izan duen jendeari deialdia egin eta bertan kantatzeko gonbitea egin nahi diete korukideek. Egunero 25 urte ez direla betetzen-eta, aurten ahalegin berezi bate gin nahi dutela erabaki dute. 1994az geroztik, hutsik egin gabe urtero urtero parte hartu izan dute Gabon Abesti lehiaketan, tartean garaipenak eta ohorezko postu bikainak lortuz.

Jaia, festa eta konpromisoa uztartu nahi dituzte bereziki edizio honetan, eta horretarako, euren buruei erronka jarri diete: 100 abeslari lortzea egun horretan kantatzeko eta ondoren egingo den afari eta ospakizunerako. Horretarako, Xabier Vesga zuzendariak «ahoz ahokoa erabili» dezaten dei egin die korukideei, «ahalik eta jende gehiena bildu gaitezen urteurrenaren ospakizunean». Egun hori, «ederra eta hunkigarria izango dela» ziur azaldu da zuzendaria eta beraz, «aitzakiarik ez dago aurtengoan denbora pixka bat atera eta gure abesbatzan parte har-tzera ez animatzeko».

Abenduaren 29a, larunbata, da gorriz markatua daukaten data abesbatzakoek; orduan egingo delako Ereintzaren Gipuzkoako Gabon Abesti lehiaketa. Dena den, egun hori baino lehen kantuak ikasi eta entsaiatzeko, interesa dutenek «urriaren hirugarren asteburutik aurrera» erne egon daitezen eskatu du zuzendariak, orduan hasiko baitira korukoak biltzen eta entsaiatzen. Afariaren xehetasunak, «eguna hurbildu ahala» ematen joango omen dira.

 

Fotos

Vídeos