Errenteria

Gazteek dantzan jarri dute Errenteria

Murixka (Lezo), Aurtzaka (Beasain), Hondarribiko Musika eta Dantza Eskola (Hondarribia)eta Udaberri (Tolosa) dantza taldeak, Zumaiako Musika Eskolako kide (Zumaia) eta Zubietako joaldun gazteekin (Zubieta), hartu dute parte Errenteriako Herri Arte Eskolako dan-tzariekin batera aurtengo Dantzari txiki egunean. Hirurehun bat lagun kalejiran ibili ziren hirian barna goizetik hasita eta plaza desberdinetan dantza eskainiz ikusle ugari ondoan zituztelarik txoko desberdinak dantzaz beteaz. Ereintza Dantza Taldeak antolatutako Oreretako Dantzari Txiki egunak arrakastatsua izan da, parte hartze aldetik eta sortutako giroari esker.

Egunari hasiera eman eta gero, Koldo Mitxelena plazan saioa eskaini zuten bertan elkartutako dantzariek euren jantzi dotoreekin. Gero, Zumardira hurbildu dira eta hilaren 15etik 25era izango den Euskaraldiari keinu egin diote. Bertan, familia argazkia egin zen euskararen aldeko ariketa erraldoiaren pankartaren atzean.

Gero, indarrak berreskuratzeko, Gautxori, Txepetxa, Alkartasuna, Amulleta, Txintxarri, Landare, Hibaika eta Gure Toki elkarteak prestatutako bazkaria dastatzeko aukera izan zuten atzo Errenteriara hurbildu ziren dantzariek.

Arratsaldean, trikitilariek dan-tzaldiari hasiera eman zioten Gamon Zumardian. Ondoren, Modestok eskainitako piezekin aritu ziren dantzan bertaratutakoek.

Egun polit honi amaiera emateko Gamon Zumardian agurra, agintariarena, fandago eta arin-arina dantzatu zituzten guztiek elkarrekin.