'Erriola' itsasoratu da Errenteriako Lekuonan festa giro paregabean

Haur Hezkuntzatik hasi eta DBHra bitarterako ikasleak igo ziren taula gainera, baita ikasle ohi, familia eta langileak ere. Herriko hainbat eragilek gehitu ziren ekitaldi paregabera, besteak beste, Zaria abesbatzak, Ereintza Dantza Taldeak, Errenteriako Musika Bandak eta Kukaiek.

Txalaparta, biolina, danbolinteroa... musika eta soinuen konbinazioa izan ziren protagonista ekitaldiaren hasieratik amaierara arte. Gainera, aukeratutako leloa ezagutarazteko asmoz, bideo bat proiektatu zen, non aitona batek bere bi bilobei Errenteriako errioari buruzko historia azaltzen zien. Manchester txikia ekarri zuten gogora.

Erritmo musikarien eta maila handiko dantzen artean, pixkanaka 2023ko Kilometroak festaren lelo eta logo berria izango zenaren seinaleak eman ziren. Zutik egon arren, ikusleak eroso egon ziren, eta Oreretako ikasleek eskaintzen zizkieten galletak ere dastatu ahal izan zituzten. Azkenean, 2023ko urriaren 1a bera balitz bezala, festa giroan eta saltoka eszenatokiaren gainean, logoa eta leloa deskubritu ziren: 'Erriola'. Zergatik?

Errioa eta iola; herria eta ikastola batzen dituelako. «Historia eta nortasuna irudikatu nahi dituen lema», adierazi zuen Itziar Navarrok, Orereta ikastolako lehendakariak. «Izan ere, nortasuna du errioak Orereta-Errenterian. Herriaren erdigunetik pasatzen delako, bizimoduaren erdigunean egon delako, erdiguneak sortu dituelako. Erriotik, herri», jarraitu zuen azaltzen.

«Errioa da, ez ibaia. Itsasoaren gertutasunak fenomeno natural propio bihurtzen du», berretsi zuen Navarrok. «Kostalde-kostaldean ez egonagatik, mareak gora eta behera egiten du, urak bi noranzko ditu; gorabeherak izaten ditu, ez du beti aldarte bera; ur gaziak eta gezak bat egiten dute, elkar hartzen dute; bi urertz batzen ditu; zubiak sor-tzen ditu; iolak ditu garraiobide, belaunaldiz belaunaldi herentzian jasotzen eta izena mantentzen duten egurrezko txalupak; faktorien kokaleku da, sormenaren eta jardueren hazi. Herri baten isla garbia», jarraitu zuen.

Logoaren harian, «ez da sinbolo hutsa: bertan daude errioko uraren gorabeherak, faktoriak eta etxeak, hor daude ur-bazterrak, islak eta zubiak. Hor daude piezak, bakarka beren izaera dutenak eta elkarrekin beste zerbait josi eta sortzen dutenak», azaldu zuen lehendakariak.

Bukatzeko jendea animatu zuen «Kilometroak festan aktiboki parte hartzera, kalera irtetera eta geureganatzera». Halaber, eskerrak eman nahi izan zizkien inplikatutako eragile guztiei, eta elkartasuna adierazi nahi izan zien «une txarrena pasatzen ari diren ikastolei». Era berean, gogoratu zuen Kilometroak «ez dela egun bakarreko festa handi bat, baizik eta urte osoan zehar hitzordu txikiekin ospatzen de-na», bukatu zuen Navarrok.

Hau Errenterian antolatuko den Kilometroak festaren hirugarren edizioa izango da, 1984an eta 1999an burutu ondoren eta ikastolaren 60. urteurrenarekin bat eginez, 2023an.

Jaiaren harira propio egindako arropa berria ere taula gainean erakutsi zuten eta salgai egongo da gaurtik aurrera ateak zabalduko dituen dendan, Herriko Enparantzan, 11. zenbakian. Jada, 'Erriola' itsasoratu da Errenterian ilusioz gainezka.