Usurbilgo sorkuntza artistikoa ezagutzeko bisita gidatua

Zumeta Arte Estudioko irudia/Jose Usoz
Zumeta Arte Estudioko irudia / Jose Usoz

'Harria hitz' ibilbidea egingo dute larunbatean, uztailak 13, udalerrian, euskal kultura garaikidearen susperraldian jokatutako papera ezagutaraztea helburu

DVDonostia

'Harria hitz' bisita gidatua egingo dute Usurbilgo elementu arkitektonikoetan zehar, larunbatean, uztailak 13. Usurbilgo frontoian elkartu eta herrigunean ibiliko dira parte hartzaileak, arratsaldera arte luzatuko den egitarauari hasiera emanez.

Euskal tradizioa eta modernitatea uztartu dituen herria da Usurbil, baita euskal sorkuntzarekin konprometitutako herria ere. 'Harria hitz' ibilbideak, herrigunean ikus daitezkeen zenbait elementuren bitartez, Usurbilek euskal kultura garaikidearen susperraldian jokatutako papera ezagutaraztea du helburu. 10:00etan ekingo diote bisitari.

Ibilbideak herriguneko zenbait elementutan egingo du geldialdi informatiboa. Besteak beste, Dema Plaza, Udarregi bertsolariaren omenezko eskultura, Jose Luis Zumetaren murala, Mikel Laboa Plaza, Alejandro Tapiaren murala, Askatasuna Plaza eta Sagardoaren Monumentua ikusi eta aztertzeko aukera izango da.

Leku horien bidez, udalerriko alderdirik esanguratsuenak ezagutarazi nahi dituzte, hala nola sagardo produkzioa, Artze anaiak, Tapia, Mikel Laboa eta Zumeta artistak, edota gizon proba.

Gero, 11:15ean, TxTxTx Txokoaldeko Txalaparta Txokoa –Oreka TX taldeko txalapartariek Usurbilen entseatzeko eta erakustaldiak egiteko duten gunea– ezagutzeko aukera izango da.

Zumeta Arte Estudioan, Jose Luis Zumeta margolariak eta bere alaba Usoak partekatutako espazioan murgilduko dira 12:30ean. Horrez gain, arratsaldean, Usoa Zumetarekin batera familientzat serigrafia tailerra prestatu dute. 6 urtetik gorako haurrentzako dago pentsatuta. Serigrafia teknika ikasi eta norberak bere kamiseta estanpatzeko aukera izango da.

Temas

Euskera