Sei plaza Aprendiztegi eskolan zurezko ontziak egiten ikasteko

Aprendiztegiko ikasleak, lanean./ALBAOLA
Aprendiztegiko ikasleak, lanean. / ALBAOLA

Albaolaren nazioarteko ontzigintza eskolak epea zabaldu du hirugarren promozioan eskaintzen dituen lekuak betetzeko

2017ko irailean Albaola elkarteak Aprendiztegi Lance Lee Nazioarteko Ontzigintza Eskola jarri zuen abian. Mundu osoko ikasleek bete zituzten lehenengo eta bigarren promozioak, ia galduta zegoen itsas lanbidea ikasi asmoz. Izan ere, Euskal Herriko ikasleekin batera hainbat lekutako ikasleek eman zuten izena, besteak beste, Frantzia, Italia, Belgika, Grezia eta Estatu Batuetakoak.

Belaunaldi berriei zurezko ontzigintza transmititzeko helburuarekin sortu zen eskola, eta doakoa da. Hala ere, oso plaza gutxi eskaintzen ditu urtean, sei baino ez. Albaolak ohar baten bidez azaldu dueenez «Europan berritzailea den formakuntza eredua eskaintzen du, ikasleen motibazioan eta hezkuntza esperientzialean oinarritua».

«Aprendiztegiren ezaugarriek munduan bakana bihurtzen dute», diote. Batetik, «goi mailako 3 urteko formakuntza integrala eskaintzen du; bestetik, tamaina handiko ontziak eraikitzen dira bertan. Ikasleek eraikuntzaren fase guztietan hartzen dute parte, teknika berriak eta tradizionalak ikasiz».

Eskola berezia

Beste berezitasun batzuk ere baditu eskolak. Izan ere, profesionalen ondoan aritzen dira ikasleak Pasaiako Itsas Kultur Faktorian, eta museo-ontziola bisitatzen duten bisitarien aurrean ere bai. Horrez gain, San Juan baleontziaren eraikuntzaren parte izateko aukera dute, ontzi hori delarik UNESCOk babestutako ondare eta zientzia balioa duen ontzi bakarra munduan.

San Juanaren eraikuntzan parte hartzeaz gain, Aprendiztegiko ikasleek hiru ontzi eraiki dituzte: 'waterwag' bat, 4 metroko luzera duen estropadetarako jatorri irlandarreko belaontzia, honezkero saldua; EEBBetan diseinatutako 3,5 metroko 'shellback dinghy' bat eta 'couralin' bat, Aturriko ontzi tradizional bat alegia. Gaur egun, ikasleak XX mende erdialdeko 5,5 metroko batel baten erreplika bukatzen ari dira, eta beste bi ontziren eraikuntzarekin hasi dira, bata 10 metro baino gehiagoko luzerakoa eta bestea 15 metrokoa.

Albaolako arduradunek diotenez, haientzat «beti izan da garrantzitsua eskola hau abian jartzea, eta gaur egun proiektuaren bizkar hezurraren parte da. Funtsezkoa da itsas ondareak bizirik jarraitzeko helburuari begira eta zurezko ontzigintzaren lanbidearen transmisiorako, gal ez dadin, hala nahi duten guztientzat eskuragarri jarriz». Izena emateko epea zabalik dago; informazio gehiago nahi duenak hemen aurkituko du,

Temas

Euskera