'Klika' egin dute milaka donostiarrek, Txillardegi gogoan

42 kilometro egingo ditu, guztira, Korrikak Donostian / Morquecho

Guztira, 42 kilometro egingo ditu auzoz auzo, gipuzkoar hiriburuan: Txillardegiren bilobek, Xabi Prieto Realeko futbolariak, Eneko Goia alkateak eta EAJ, PSE-EE, EH Bildu eta Irabazi alderdietako ordezkariek eramango dute lekukoa, besteak beste

El Diario Vasco
EL DIARIO VASCODonostia

Tipi tapa, tipi tapa, Donostiara heldu da 21. Korrika, ekimenaren 9. egunean. Guztira, 42 kilometro egingo ditu kalez kale, auzoz auzo, gipuzkoar hiriburuan. Jendetza handiak eraman du Zumaia, Zarautz, Orio eta Lasartera lekukoa, eta gero, Añorgatik Antiguara, Donostian ibilbideari ekiteko. 5 orduz, tropelak Gipuzkoako hiriburuko kaleak alaituko ditu. Hiriko erdigunean, Txofre inguruan, Txillardegiren bilobek hartu dute lekukoa. Idazlea da aurtengo Korrikaren omendua, euskara batuaren 'aita' izan zelako, besteak beste. 'Klika' egin zuen, eta hala egin dute donostiarrek ere.

Hainbat jarduera antolatu dituzte hiriko auzoetan, Korrikaren harira. Esaterako, Añorgan, 16:00ak aldera, kalejira auzotik izango da lekukoaren zain dauden bitartean. Amara Berrin, arratsaldeko 17:00etan, dultzaineroak, trikitilariak eta txistulariak auzoko kaleetan zehar ibiliko dira, eta gazteentzako jolasak egingo dizute Olaeta plazako egoitzan. 17:30etik aurrera, Amara Berrikoak kantuan ibiliko dira auzoko kaleetan zehar.

Bidebietan, 17:00etatik aurrera, gazteentzako jarduerak egingo dira. Isasa parkean, dortsal, peto eta txapa ikastaroa eskainiko da, eta ere Jonhytronic DJ-a, zumba, euskal dantza eta street dance saioak izango dira. Haurrentzat, berriz, herri kirolak, txokolate jana, eta euskaraokea antolatu dituzte. Egian, 17:00etan, jolasak izango dira Plaza Haundin. 18:30ean, dantza ikasleen emanaldia Blas de Otero plazan eta 19:30ean, Klarinete taldearen emanaldia Jubilatuen etxean.

Parte Zaharrean euskal dantza tradizionalen erromeria egingo dute Korrikaren etorrera ospatzeko, 19:00etatik aurrera. Bagera Donostiako Euskaltzaleen Elkarteak eta Donostiako Musika eta Dantza Eskolak antolatu dute. Udalaren Txistulari Taldearen eskutik kalejira, fandango, arin-arin, muxiko, polka eta abar luzea ikasi eta dantzatzeko tartea izango da Nora Garzia eta Jone Murua animatzaileen laguntzaz. Loiolako Erriberan, 17:15ean, peto ikastaroa eta txikien beroketa iragarri dituzte musikarekin, Barcelona hiribideko 6 zenbakiko arkupeetan. Antiguan, 20:00etan, 'Antiguan lo ez!'; 70eko eta 80eko hamarkadetako abestiekin girotutako goatekea antolatu dute.

15 kilometro

Guztira, Donostian kilometro bat erosi duten talde, enpresa, eragile, zein norbanakoak 15 dira, beraz, 115 aldiz pasatuko diote elkarri lekukoa hirian zehar. Horien artean Xabi Prieto Realeko futbolaria, Eneko Goia alkatea eta EAJ, PSE-EE, EH Bildu eta Irabazi alderdietako ordezkariak. Baina ez dira protagonista bakarrak. Izan ere, 34 eskola eta ikastoletako 7.500 haur eta gazte bildu dira hirian zehar 16 Korrika Txiki egiteko.

Iluntzeko bederatzietan, Altzatik ibili ostean, Pasai Antxorako bidea segituko du karabana koloretsuak, Trintxerpen sartzeko Bidebietatik. San Pedrotik Pasai Donibanerako zeharkalea barkuz egin eta Oarsoaldeko ibilbideari jarraituko diote, Lezora ailegatu arte.

Hamaikak aldera lekukoa Oreretan egongo da eta gauerdirako Oiartzunen sartuko da, Arraguatik. Azken herri horretan, Ugaldetxo auzoan, kilometro berezia egingo dute Ar Redadeg bretoieraren aldeko ekimeneko lagunek.

Hernanirako bidean harrapatuko dituzte apirilaren 13aren lehenengo orduek korrikalariak eta furgoneta. Hernanitik Urnietara joango dira, eta handik Andoain, Tolosa, Eibar eta Durangora.

Noiz eta nondik igaroko da Korrika Donostian?

Añorga - Antigua (16:28)
Errekaldeko rotonda, Añorga hiribidea, Añorga txiki, Tolosa hiribidea, Zumalakarregi hiribidea, Sukia kalea, Erregezaintza kalea, Mikelete pasealeku, Matia kalea, Benta Berri kalea, Zumalakarregi hiribidea, Satrustegi hiribidea eta Mirakontxa pasealekua
Erdialdea (17:15)
San Martin kalea, Hondarribia kalea, Askatasunaren hiribidea eta Republika Argentina kalea
Gros (17:29)
Kursaaleko zubia, Zurriola hiribidea, Peña eta Goñi kalea, Kolon pasealekua, Euskadi Plaza, Frantzia pasealekua, Maria Kristina zubia, Gernikako Arbolaren pasealekua, Foru pasealekua, Santa Katalina zubia, Mirakruz kalea, Galtzada Nagusia, Secundino Esnaola kalea, Segundo Izpizua kalea, Claudio Delgado doktorea kalea, Nafarroa hiribidea, Marino Tabuyoko biribilgunean buelta, Nafarroa hiribidea, Zurriola hiribidea eta Kursaal zubia
Parte Zaharra (17:57)
Salamanka pasealekua, Soraluze kalea, Abuztuaren 31 kalea, Kale Nagusia, Portu kalea, Kaimingaintxo kalea (kaia), Ijentea kalea, Kale Nagusia, Fermin Kalbeton eta San Juan kalea
Erdialdea (18:11)
Bulebar zumardia, Hernani kalea, Andia kalea, Miramar kalea eta Urbieta kalea
Amara – Amara Berri (18:18)
Pedro Egaña kalea, Easo plaza, Autonomia kalea, Easo plaza, Moraza kalea, Urbieta kalea, Antso Jakituna hiribidea, Pio XII.aren plaza, J.Manuel Collado kalea, J.Mª Salaberria kalea, Familia Santua kalea, Errondo pasealekua, J.Manuel Collado kalea, Pio XII.aren plaza, Madril hiribidea, Aita Donostia plaza, Madril hiribidea, Isabel II etorbideea, Irun plaza eta Gregorio Ordoñez kalea.
Loiolako Erribera (18:46)
Bartzelona hiribidea eta Juan Zaragueta kalea.
Loiola-Martutene (18:53)
Aralar mendia kalea, Antzieta pasealekua, Martutene pasealekua, Pilarreko Andra Maria, Martutene pasealekua, Antzieta pasealekua, Loiola Zeharbidea, Urbia kalea eta Aralar mendia kalea.
Egia (19:35)
Egia kalea, Mandasko Dukea, Biribilgunean buelta, Mandasko Dukea, Egia kalea, Ametzagaña kalea, Maria Reina elizan ezkerretara, Karmengo Andre Maria kalea, Ametzagaña kalea, Polloe plaza eta Sibilia kalea.
Intxaurrondo (20:03)
Baratzategi pasealekua, Galizia pasealekua, Otxoki pasealekua, Baratzategi pasealekua, Zarategi pasealekua, Pablo Sorozabal plaza, Mons pasealekua beherantz, Altarizar kalea, Intxaurrondo kalea eta Jose Elosegi Alkatea hiribidea.
Altza (20:31)
Herrera pasealekua, San Luis Gonzaga plaza, Txingurri pasealekua, Larratxo pasealekua, Txirrita Bertsolaria pasealekua, Larratxo pasealekua, Leosiñeta kalea, Lauaizeta kalea, Txapiñene kalea, Larratxo pasealekua, Altza pasealekua, Kasares pasealekua eta Buenabista biribilgunea.
Bidebieta (21:31)
Pasaiako portuko zeharbidea, Jose Elosegi Alkatea hiribidea, Pasai San Pedro hiribidea, Joan XXIII.aren pasealekua, Julio Urkixo ibilbidea, Serapio Mujika, Joan XXIII.aren pasealekua, Pasai San Pedro Hiribidea eta Trintxerpeko biribilgunea.

Irakurri gehiago

Temas

Euskera