Giro paregabea Arditurri Egunean

Taloak egiten baino hobeto moldatu ziren jaten. /Koxko.
Taloak egiten baino hobeto moldatu ziren jaten. / Koxko.

Meategiak ikusi, hegaztiak askatu, jan eta edan... denetik egin zuten bisitariek

KOXKOOIARTZUN.

Atzo ospatu zuten zortzigarren aldiz Arditurri Eguna. Jende asko animatzea beti izaten da eguraldi onaren seinale eta atzo ez zen salbuespena izan, hirurehun pertsona inguru hurreratu baitziren meatzeen inguruan. Aparkalekua lepo zegoen arren, asko izan ziren bizikletaz edo oinez joan zirenak. Arditurri Parketxeko kideek egitarau zabala prestatu zuten eta familia giro ederrean igaro zuten goiza bertaratu zirenek. Goizeko hamarrak aldera hasi zen jendea pixkanaka hurbiltzen eta 10:30ean sartu ziren lehenengo bisitariak meatzeetara, ikusmin handiarekin. Guztira ehun eta hogeita hamar pertsona sartu ziren eta gehienak aho zabalik irten ziren, ikusitakoarekin txundituta.

Igeldoko Arrano Etxean sendatutako hegaztiak askatzen ikustera ere jende multzo polita hurbildu zen. Basozainek azalpen batzuk eman eta galdera batzuk erantzun ostean, guztira, hiru hegazti mota askatu zituzten, belatz gorria, miru beltza eta hiru zozo. Tartean, triku bat ere askatu zuten, txikienen gozamenerako. Animalia guztiak inongo arazorik gabe itzuli ziren beren etxera, naturara.

Mineralen bila saioan ere talde polita bildu zen, Luberri museoko kideek harri berezi hauen inguruan emandako argibideei arreta handiz entzunez. Oso gustukoa izan zutela adierazi zuten parte hartu zutenek.

Gainera, goiz osoan zehar bisitariek historiaurreko bizimodua esperimentatzeko aukera izan zuten, arkua eta bultzagailuarekin jolasean aritu baitziren. Abaraxka ludotekako eta Oihartzun Gukeko kideek jateko eta edateko postutxo bat ere jarri zuten. Bertan, nork bere taloa egiteko aukera izan zuen, eta esan daiteke horixe izan zela arrakasta handien izan zuen jarduera, Arditurrin izan zen inor ez baitzen talorik jan gabe geratu!