Euskara hutsezko beste irrati bat urtarrilaren 1etik aurrera

2012an esleitu zizkioten zortzi FM lizentzietatik bost piztu ditu Euskal Irrati Zerbitzuak enpresak, horietako hiru Gipuzkoan: Donostian, Beasainen eta Azkoitian

Euskara hutsezko irratien eremuan hutsunea utzi zuen abenduaren 15ean 13 urteko ibilbidearen ostean betiko isildu zen Info7 irratiak. Ez du ordea luze iraun osatu gabe eremu horrek, urtarrilaren 1ean euskara hutsezko ahots berri bat helduko baita euskarazko irratiaren mapara: Euskal Irrati Zerbitzuak deiturikoa.

Horixe da, hain zuzen, Ibon Altuna Euskal Irrati Zerbitzuak SL-ko administratzaileak sinatzen duen ohar baten bidez aurreratu duten data. Info7 berari, Hamaika Telebistari edota Naiz atari digitalari, eta horietan guztietan parte hartzeaz gain proiektuaren jatorrian Gara egunkaria duen EKHEri (Euskal Komunikabideak Hedatzeko Elkartea) eskainitako laguntza eta «orain arte egindako guztia» eskertzeaz gain, proiektuaren ibilbide luzea dakar gogora oharrak.

Izan ere, 2012 urtean «maiztasun modulatuko uhin metrikoen bidezko irrati-komunikazioko zerbitzuak eskaintzeko» 34 lizentzia emateko lehiaketa publikoa deitu zuen Eusko Jaurlaritzak. FM lizentzia horietako 11 euskara hutsezko programazioari eskainitakoak ziren. Lehiaketa hartan zortzi lizentzia esleitu zizkioten Euskal Irrati Zerbitzuak enpresari. Bilbo, Durangaldea, Gernika, Donostia, Beasain, Legazpi, Azkoitia eta Gasteizen. Euskal Irrati Zerbitzuak-ek, hain zuzen «euskara hutsezko nazio ikuspegia duen irrati proiektua aurkeztu zuen».

Ugariak izan dira gorabeherak orduz geroztik -hainbat helegite tarteko, besteak beste- baina azkenean, «sei urte igaro ondoren, eta garai hartan ematen ziren baldintzak egun oso ezberdinak izan arren, gaur iragarri nahi dugu, lan eta hausnarketa sakon baten ondorioz, urtarrilak 1 ean hasiko duela bere ibilibidea nazio ikuspegiko euskara hutsezko irratiak».

Hasteko bost frekuentzia piztu dituzte, honako hauek: Bilbo 92.2, Durangaldea, 97.4, Donostia 93.8, Beasain 102.2, eta Azkoitia 91.8. Ohartarazi dutenez, «sintonizazio eta froga fasea hasi dugu, beraz interferentziak izango dira hasiera batean, horiek konpontzea izango da lehentasuna». Aurreratu dute, halaber, beste hiruak datozen hilabeteetan piztuko dituztela.

Temas

Euskera
 

Fotos

Vídeos