Euskara Foru Aldundiko «lan hizkuntza nagusia» bilakatzeko plana

Markel Olano eta Garbiñe Mendizabal, ostiral honetako agerraldian./GFA
Markel Olano eta Garbiñe Mendizabal, ostiral honetako agerraldian. / GFA

Euskararen erabilera normalizatzeko VI. Plana aurkeztu dute Markel Olano diputatu nagusiak eta Garbiñe Mendizabal Hizkuntza Berdintasuneko zuzendariak

Gipuzkoako Foru Aldundiak maila ona du langileen hizkuntza gaitasunari dagokionez. Hizkuntza Berdintasuneko Zuzendaritza Nagusiak berriki egindako neurketen arabera, euskara ezagutza maila «altua da langileen artean, %80tik gora baitaki euskara ongi edo oso ongi eta, gainera, hizkuntza eskakizunen bat esleituta duten lanpostuetako langileen %80k baino gehiagok baitauka dagokion hizkuntza eskakizuna edo altuagoa». «Beraz, oro har, Aldundiko langileriak euskara maila ona du», azaldu du Markel Olano diputatu nagusiak, Garbiñe Mendizabal Hizkuntza Berdintasuneko zuzendari nagusiarekin batera aurkeztu duen Gipuzkoako Aldundiko VI. Euskara Planaren aurkezpenean.

2018-2022 aldiko jardun linguistikoa arautzen duen plan horren xedea, hortaz, gaitasun hori areagotzeaz gain -«datozen urteetan %100ra gerturatuko gara Aldundiko langile euskaldunei dagokienez», aurreratu du Olanok-, erabileran koska bat igo eta euskara «lan hizkuntza nagusi» bilakatzea da.

Markel Olanok nabarmendu du hiru printzipiotan oinarritzen dela erronka hori: «Herritarrek hizkuntza hautatzeko duten askatasuna; hizkuntza berdintasuna eta justizia. Euskarak urtetan bizi izan ditu zapalketa eta diglosia, eta justiziazkoa da horren horren jarrera proaktiboa izatea». «Herritarren bizikidetza hobetzeko jomuga»-rekin lotu du diputatu nagusiak euskara lan hizkuntza nagusi bilakatzea.

Partaidetza prozesua

Erabakiaren oinarrian «hizkuntza berdintasunaren bidean sakontzen jarraitzeko determinazioa» dago. Olanok gogoratu du Aldundiak gaur egun herritarren hizkuntza eskubideak bermatzen dituela, «herritarra baita harremanetarako hizkuntza hautatzen duena eta langileak hautu hori errespetatu egiten du». Hori dela eta, zerbitzu hizkuntza izatearen langa gainditu eta euskara lan hizkuntza nagusi bilakatzeko jardun horretan «indar» egitea erabaki du Aldundiak, joera «proaktiboa» berretsiz.

Salbuespenak salbuespen herritarrak euskarazko zerbitzua ia bermatuta daukala esan badaiteke ere, diputatu nagusiak ohartarazu du «erabilera ez dela oraindi (ezagutzaren) maila berekoa». Haren iritziz, «neurri handi batean», egoera hori «lan dinamikekin lotuta» dago, eta ohitura horiek dira, hain zuzen, plan berriarekin «aldatzeko bidean» jarri nahi dituztenak, «betiere, euskaraz funtzionatuko duen erakundea helburu izanik».

Hori bultzatuko da «euskaraz egin daitekeena euskaraz eginda, bilerak, dokumentuak euskaraz sortuta, prestakuntza euskaraz emanda, internet eta baliabide informatikoetan, jendaurreko ekitaldietan...».

Aurreneko aldiz, gainera, Planaren idazketan hainbat langileren iradokizunak jaso dituzte «partaidetza prozesu emankor bat eginda». «Ahalik eta langile gehienek erabakiaren edukia bere egin dezaten» jaso nahi izan ditu Hizkuntza Berdintasuneko Zuzendaritza Nagusiak erakundeko langileen ekarpenak-

Hizkuntza Berdintasuneko zuzendari Garbiñe Mendizabalek nabarmendu du partaidetza prozesua aurreko plangintzaldietan «inoiz egin gabea» dela, planaren ikuspegia, edukiak eta orientabidea teknikariekin eztabaidatzeko eta haien ekarpenak jasotzeko xedez«. Guztira, 103 teknikarik parte hartu dute (A eta B sailkapen taldekoak), 56 emakumek eta 47 gizonek. Hizkuntza Berdintasuneko Zuzendaritza Nagusiak 23 ekarpen hartu ditu, batzuk araubidearekin lotutakoak, eta beste batzuk planaren aplikazioarekin erlazionatutakoak.

Temas

Euskera

Contenido Patrocinado

Fotos

Vídeos