Euskararen legezko markoa aldatu beharra aztertuko da 'Lurraldea eta Hizkuntza' II. Jardunaldietan

Euskararen legezko markoa aldatu beharra aztertuko da 'Lurraldea eta Hizkuntza' II. Jardunaldietan

Otsailaren 5 eta 6an egingo dira Donostian

M. I. donostia

Ikuspegi ezohiko samarretik ekin zitzaion iazko 'Lurraldea eta Hizkuntza' lehen jardunaldietan euskararen inguruko gogoetari, lurralde antolaketak hizkuntzarengan eta hiztunengan duen eragina aztertuz eta, horren aurretik, harreman hori aintzat hartuz. Foru Aldundiak, UEMAk, Kontseiluak eta UEUk antolatutako jardunaldiak arrakastatsuak izan ziren, 200 parte-hartzaile izan zituztela.

Segida izango dute aurten, 'Lurraldea eta Hizkuntza. Erronkak&Tresnak II. Jardunaldiak' izenpean, euskararen arnasguneak babestu eta indartuko dituen arkitektura juridiko berri baten beharra aztertzeko asmoz. Donostian egingo dira, UPV/EHUren Carlos Santamaria zentroan, otsailaren 5 eta 6an. Matrikula doan da eta izena www.ueu.eus web gunean eman behar da.

Jardunaldien aurkezpenean Foru Aldundiko Euskara Zuzendari Zigor Etxeburuak azaldu duenez, argi geratu zen aurreneko edizioan euskaraz bizi ahal izateko baldintzak sortzeko eta eta bitartekoak jartzeko, aspektu sozial guztiak kontuan hartu behar direla, orain arteko ikuspegia zabalduz. Eta horrek, Kontseiluko Paul Bilbaok esan duen bezala,euskal komunitatea osorik babesteko eta indarberritzeko paradigma berriak eraikitzea eskatzen du, besteak beste politika publiko guztietan hizkuntzaren zeharlerrotasuna kontuan hartzea, eta ez bakarrik euskarari dagozkionetan, eta hizkuntza-politika territorializatzea, lurraldetasun-printzipioari begira jartzea.

Iazko jardunaldien ondorioetan jasota geratu ziren printzipio horiek, baita eragin linguistikoa neurtzeko ELE tresna definitu beharra ere. ELE sistematizatzeko eredua aurtengo eta honezkero abian dauden ezarpen esperientziaren batzuk jardunaldietan aurkeztuko da, eta UEMA udalerri euskaldunen mankomunitatean egin dituen bi azterketa guztiz interesgarri ere bai.

Eztabaida teoriatik praktikara ekartzea, alegia, UEMAko lehendakari Maren Belastegiri egokitu zaio, zuzenean ari baitira nozitzen UEMAra bildutako hainbat udal, Carlos Urquijo Espainiako gobernuko ordezkariak eragiten dituen helegiteak direla medio, zein zaila da urrats eraginkorrak egitea. Egin dituzten azterketetan eta egunero bizi duten egoeran oinarrituta, euskararen egungo legezko marko juridikoa aldatzeko beharra aztertuko dugu, aurreratu du Belastegik.

Unai Fernandez de Betoño UEUko zuzendaritzako eta jardunaldiko batzorde akademikoko kideak zehaztu ditu egitaraua osatzen duten bost atal nagusiak. Udako Euskal Unibertsitatearen web gunean eskura daiteke programa osoa.

 

Fotos

Vídeos