42. edizioak UEUri eusten dion sarearen sendotasuna erakutsi du, ikastaroen arduradunaren ustez

500 matrikula izan dituzte Eibarren, Baionan eta Iruñean egin diren ikastaroek eta arazoren batekin topo egin badute ere, giro onean egin dira

N. A. DONOSTIA.

Ia hilabetez Eibar, Baiona eta, azkeneko saioetan, Iruñea korritu ondoren, ateak itxi ditu aste honetan Udako Euskal Unibertsitateak antolatutako udako ikastaroen 42. edizioak, ateaz bestaldean oroitzapen, gogoeta eta ekarpen ugari utzita. 'Saretu' zuten aurtengo leloa eta, Irati Iciar ikastaroen arduradunaren ustez, UEUri eusten dion sarearen sendotasuna eta indarra nabarmendu dute aurtengoek.

42. edizioan, 42 ikastaroz osatutako eskaintza zabal eta askotarikoa zeukan prestatuta UEUk 2014ko uztailerako. Azkenean ikastaroek %70ak egin du aurrera, eta hori portzentaje polita da. Parte-hartzaileei dagokienez, 500 matrikula izan dira, «sarearen osasun ona» erakusten duen kopurua.

Dena ez da izan ordea erraza, eta zailtasunak ere baditu gogoan Irati Iciarrek. Aurreneko bi asteetan, ekainaren 30etik uztailaren 14ra, etxean jokatu zuten, Eibarko Markeskoa jauregian duten egoitzan hogeitik gora ikastaro eskaini baitzituzten. Baionarako jauzia egiterakoan, haatik, ezusteko larri batekin egin zuten topo. «Aurten ezusteko handiena Baionako Unibertsitatearen instalazioak ezin genituela erabili izan da», dakar gogora Iciarrek. Elkartasunaren eskutik heldu zen konponbidea azkenean: «Presaka ibili ginen beste toki baten bila, ez baikenuen tarte handiegirik. Aurtengo leloari jarraituz, 'Saretu', laguntza deia egin genuen eta AEKko ikasgelak eskaini zizkiguten, bai eta Euskal Museokoak ere».

Azken egoitza horri lotu dio Irati Iciarrek amaitu berri den edizioaren anekdota gogoangarriena. «Ikastaro batek matrikula asko izan zituen eta AEK-ko egoitzan sartzen ez ginenez, Baionako Euskal Museoko gela batean egin behar izan genuen ikastaroa. Eta gauzak nolakoak diren, ikasgela horretan bertan UEU sortu zen 1973. urtean. Badirudi zirkulua itxi egin dugula eta hasi ginen tokira bueltatu garela».

2014ko zirkulua 1973koa baino askoz ere zabalagoa izan da haatik. Lehenik eta behin, ikastaroetarako proposamenak onartu zitezkeenak baino askoz ere gehiago izan direlako -ehundik gora-, lau hamarkadaren buruan euskaraz jakintzaren alor guztietan lortu duen sendotasunaren lekuko.

Bost ataletan sailkatu dira aurten ikastaroak, eta kasurik gehienetan jakintzaren alor desberdinetako saioak hiru egoitzetan garatu dira. Gizarte-zientzien alorrekoak izan dira ikastaro gehienak, hezkuntzari, kazetaritzari, soziologiari edota zuzenbideari lotutako gaien inguruan 20 ikastaro antolatu baitita. Batzuk goitik, bestetzuk behetik, gainerako alorrak (artea eta musika, giza zientziak, ingeniaritza eta teknologia eta zientzia) bost ikastaroen bueltan ibili dira.

Jardunaldiak ere antolatu ditu UEUk uda partean, denak Eibarko egoitzan: Osasun Zientzietako Ikertzaileen II. Topaketak; Euskal komunikazio-eremuari buruzkoa; Agroekologia, ikuspegi sozialetik gizarte eraldaketara gaiari emana eta, azkenik Hondakinen kudeaketa eta tratamenduari buruzkoa.

Udako ikastarok amaituta, Udako Euskal Unibertsitatea ez da lozorroan murgilduko, aspaldi bilakatu baitzen urte osokoa, besteak beste graduondoko eskaintzari esker. Web gunean dute urrian abiatuko direnei buruzko informazioa.

 

Fotos

Vídeos