Piraguismoa

«Nire esfortzu eta lan guztiak Espainiako Txapelketetan jarriko ditut»

«Nire esfortzu eta lan guztiak Espainiako Txapelketetan jarriko ditut»

Maddi Tarragonak piraguismo denboraldi ona egin du, baina hurrengo urtera begira, emaitzak hobetzeko helburua dauka

P.E.

Maddi Tarragona Soutok (2005eko ekainaren 10a, Errenteria) urte oso ona izan du aurtengo 2018-2019 piraguismo denboraldian. Espainiako Txapelketan lehengo urtean bigarren geratu zen, aurten zazpigarren, baina hala ere, Gipuzkoa mailan txapeldun atera da. Bederatzi urtetatik dabil piragua gainean, eta hamabi zituenetik, estatu mailako txapelketetan, aurtengo denboraldia hoberena izan ez arren, hurrengora begira ilusio handia dauka gipuzkoar gazteak.

-Nola ikusten duzu aurtengo denboraldia?

-Gipuzkoan txapeldun eta Espainia mailan zazpigarren geratu naiz aurten, baina hala ere emaitzak ez dira oso onak izan, aurreko urteko emaitzak ikusita aurten gehiago espero nuen. Estatu mailako txapelketa guztietan bigarren geratu nin-tzen lehengo urtean eta horregatik aurtengo emaitzak hobeak izango zirela uste nuen, baina lanean jarraitzeko momentua da.

-Nondik dator piraguismoaren ohitura?

-Bederatzi urte nituela lagun bat piraguismoan hasi zen, eta gustukoa zuenez nik ere probatu nuen ideiarik eduki gabe. Une honetatik aurrera nire kirolik gustukoena eta egunerokoan ezinbestekoa den arloa bilakatu zen. Bederatzi urte nituela hasi nintzen piraguismoan, hamar urterekin ikastolarteko lehiaketetan eta hamabi urterekin estatuko txapelketetan, azkenean nire bizitzaren zati garrantzitsua bilakatu da, gaur egun ia egunero entrenatzera iritsi arte.

-Entrenamendu aldaketarik izan duzu lehengo urtetik azkeneko denboraldira?

-Ez, urteak daramatzat asko entrenatzen, asteko zazpi egunetatik seitan entrenatzen naiz eta hurrengo urtera begira entrenamendu egutegia berbera izango da. Egia da, neguan inoiz baina gimnasio gehiago egin dudala, eta agian hori izan da arazoetako bat, zeren eta besoko arazoekin ibili naiz denboraldi bukaeran.

-Egun asko dira, familiak zer esaten du?

-Ba familiak ondo ikusten du, baina ez dute nahi kirola nire bizitza izatea. Azkenean, kirolak gauza asko kentzen ditu: lagunak, familia, ikasketak… Horregatik beraien aholkua hori da, disfrutatu baina oinak lurrean mantenduz.

-Eta lagunek zer esaten dute?

-Piraguismoko mundutik kanpo dauden lagunek denbora gehiegi entrenatzen dudala esaten dute, baina azkenean gustuko dudana egiten dut, piragua gainean jarri eta entrenatu. Ulertzen dut beraiek esaten dutena, azkenean sei egunetan entrenatzeak denbora asko kentzen du, baina nire bizitzaren zati garrantzitsuenetarikoa izanda…

-Bakarkako kirola da piraguismoa, zuretzat positiboa edo negatiboa da hori?

-Egia esan, nik gustukoa dut bakarkakoa izatea, azkenean nire besoetan dago txapelketaren emaitza. Hala ere, badaude bakarkakoak ez diren modalitateak eta hauek ere politak dira. Esan beharra daukat, bakarkako kirola izan arren, taldearen garrantzia oso handia dela.

-Esan duzun bezala entrenamenduetan taldearen garrantzia handia da ez? Zergatik?

-Bai, halaxe da, azkenean piragua gainean bakarka igotzen gara, baina egunerokoan taldeak garrantzi handia dauka. Klubetik ere badakite benetan garrantzitsua dela, eta horregatik noizean behin beste mota batzuetako entrenamenduak egiten ditugu. Adibidez, lehenengo astean San Pedrora joan ginen bainatzera eta entrenamendu desberdin bat egitera.

-Hurrengo urtera begira, non ikusten zara?

-Hurrengo urteko helburua Espainia mailan txapelketak irabaztea da. Aurtengo denboraldian estatu mailako emaitzak ez dira oso onak izan, baina hurrengo urtera begira nire esfortzu eta lan guztia Espainiako txapelketetan jarriko dut, aurrerapauso bat eman eta dominak lortzeko.

-Eta, hurrengo urteetara begira? hau da, lau-bost urte barru?

-Nire helburua Espainiako selekzioan egotea eta Europako txapelketa garrantzitsuenetara joatea da, baina horretarako lan asko daukat aurretik. Amets eginez (barre egiten du), kirolari guztiek bezala, ametsik handiena etorkizunean Olinpiadetara joatea da, baina horretarako geratzen diren urteetan esfortzu eta entrenamendu asko egin behar dira.

-Nola definituko zenuke zure burua? Zer da hobekien egiten duzuna eta hobetzeko daukazuna?

-Ba... hobekien egiten dudana irteera da, teknika eta indarrarekin batera, baina gero hustu egiten naiz normalean eta hori oso garrantzitsua da lasterketa ongi amaitzeko. Hori dela eta, nire entrenamenduak hemendik bideratuak egongo dira datozen hilabeteetan.

-Zer da piraguista izatetik gehien eta gutxien gustuko duzuna?

-Gehien gustuko dudana kirolean lagunekin eta taldekideekin daukagun giroa da. Eta gutxien gustuko dudana... presioa. Urte batean dominak lortzeak hurrengo urteetara begira dominak lortzeko beharra jartzen zaitu, eta horrek asko erretzen du. Azkenean, garrantzitsuena disfrutatzea da, eta hori da guztion helburua.

-Denboraldi ona burutu berri duzu. Zein izan da momenturik politena? Eta txarrena?

-Ba... ez da denboraldi oso ona izan… baina momenturik politena lehengo hilabetean Bilbon esango nuke, egun ederra izan zen uretara erori arren. Txarrena berriz oso gogoan daukat, Espainiako txapelketan Cadizen ginela, sekulako haizea zebilen eta lasterketa hasi baino lehenago gorputz barruan nuen txapelketaren emaitza txarra izango zelaren sentsazioa… eta halaxe izan zen.

-Beste kiroletan ibilia al zara?

-Bai, gimnasia erritmikoan, gehien bat. Orain ez naiz beste kiroletan ibiltzen, piraguismoan daukat burua, baina urteetan zehar beste kiroletan jardutea gustukoa nuen.

«Olinpiadetara joatea da guztion ametsa»

-Nor da zure kiroleko idoloa eta zergatik?

-Saul Craviotto, bera da munduko hoberenetarikoa.

-Gustuko duzun film edo telesail bat?

-Telesaila, 'Vis a Vis'; eta filma 'Bajo la misma estrella'.

-Gustuko duzun abeslari, talde edo abesti bat?

-Rihanna.

-Oporretara joateko leku bat?

-Ametsetan New York esango nuke, errealitatean Galizia gustatzen zait.

-Janari plater bat?

-Pasta edo lasagna, asko gustatzen zaizkit.

-Lehiatzeko duzun lekurik gustukoena?

-Trasona, Asturiasen.

-Zure bertuterik onena eta akatsik nagusiena?

-Alaia naiz orokorrean, baina batzuetan bordea ere banaiz.

-Zure kirol bizitzako poztasunik handiena?

-Cadizen izan zela esango nuke, Espainia mailan bigarren geratu nintzenenean, ez nuen batere espero eta oso polita izan zen.

-Betetzeko amets bat?

-Olinpiadetara joatea da guztion ametsa.

Temas

Euskera