Zuzendari nagusia izango du Euskal Herriko Gazte Orkestrak

EGOren entsegua, joan den urtarrilean./LOBO ALTUNA
EGOren entsegua, joan den urtarrilean. / LOBO ALTUNA

Kargu berriaren egitekoa EGOren kudeaketa zuzentzea eta proiektuaren estrategia diseinatzea izango da

Euskal Herriko Gazte Orkestra Fundazioak (EGO) hautaketa prozesu bat jarri du abian zuzendari nagusi berria izendatzeko. Kargu berri honekin EGOren kudeaketa zuzenduko da eta proiektuaren helburuak betetzeko estrategia diseinatuko du. Hautagaiak aurkezteko epea uztailaren 15ean amaituko da, eta aukeratuak direnei orkestrarekiko duten ikuspegi, estrategia eta ekarpenak azaltzen dituen proiektu bat eskatuko zaie, Eusko Jaurlaritzako Kultura eta Hizkuntza Politikako Sailak jakinarazi duenez.

EGOko zuzendari nagusi berria Fundazioaren Patronatuaren menpe egongo da, Eusko Jaurlaritzako Kultura eta Hizkuntza Politika zein Ekonomia eta Ogasuna sailetako ordezkariek osatzen dutena. Kargu berriaren helburua izango da fundazioaren xedeak garatzea eta aurrera eramatea, eta xede horiek lortzeko plan estrategiko bat garatzea.

Era berean, harremanetarako eta trukerako tokiko eta nazioarteko sareak sortu beharko ditu, bai eta komunikaziorako tresna eta protokoloak garatu ere. Fundazioaren helburuak honako hauek dira: gazteen profesional aurreko heziketari laguntzea; musika balioak sustatzea; eredua garatzea; ikastaroak eta biltzarrak antolatzea; eta informazio eta arreta zentro bat ezartzea.

Lanpostu honetara aurkezteko ezinbestekoa izango da unibertsitate titulua izatea (lizentzia, gradua edo masterra); bereziki, aintzat hartuko dira musika kudeaketako ezaguerak. Halaber, beharrezkoa izango da gutxieneko hamar urteko esperientzia kudeaketan, aukeran, musika kudeaketan, eta proiektu berri bat diseinatzeko eta aurrera eramateko gaitasuna ere.

Hizkuntzen ezagutzari dagokionez, bi hizkuntza ofizialen -euskararen eta gaztelaniaren- eta ingelesaren goi mailako ezagutza eskatuko da, frantsesez jakitea bereziki baloratuko delarik.

Aurretiko hautaketa gainditzen duten hautagaiek, hautatze prozesuaren barruan, proiektu bat aurkeztu beharko dute. Proiektu horretan azalduko dute zer ikuspegi, estrategia eta ekarpen dituzten Fundazioarentzat.

Temas

Euskera