Zinema-jaialdietara ere iristen ari da kontziliazioa

San Telmo Museoan eskainiko dute zerbitzua/Usoz
San Telmo Museoan eskainiko dute zerbitzua / Usoz

Cannesko zinema-jaialdiko 'Le ballon rouge' ekimena oinarri hartuta, Donostiako Zinemaldiak ere izango du, jaialdiko akreditatuentzat, haurtzaindegi-zerbitzua

DVDonostia

'Le ballon rouge' filmean, Pascal haurrak eskolarako bidean puxika gorria topatu eta jarraitu egiten du; abentura ugari bizi dituzte elkarrekin. Albert Lamorisse-k 1956an zuzendu zuen film hori oinarri hartuta sortu zuten Puxika Gorria haurtzaindegi-zerbitzua Cannesko zinema-jaialdian. Orain, Donostiako Zinemaldiak ere izango du, jaialdiko akreditatuentzat.

Donostia Zinemaldiak Puxika Gorria sustatuko du San Telmo Museoarekin eta Parenting at Film Festivals taldearekin elkarlanean eta CIMAren (Zinemako eta Ikus-entzunezko Bitartekoetako Emakumeen Elkartea) laguntzaz.

Cannesko zinema-jaialdiko 'Le ballon rouge' ekimenaren kideko, zerbitzuak ehun metro karratuko eremua eskainiko du San Telmo Museoan. Zinemaldiaren egoitza nagusietako bat da San Telmo Museoa, eta bertan egiten dira industriako profesionalentzat antolatutako jarduerak; besteak beste, Europa-Latinoamerika Koprodukzio Foroa.

Zaintzaile profesionalen enpresa batek kudeatuko du eremua, eta euskaraz, gaztelaniaz eta ingelesez zainduko dituzte akreditatuen seme-alabak. Zerbitzua 10:00etatik 18:00etara bitarte egongo da zabalik, irailaren 20tik 28ra arte, 6 hilabetetik 6 urtera arteko haurrentzat. Haurtzaindegiak edoskitzeko eremu bat eta gurasoentzako elkargune bat izango ditu.

Zinemaldi osorako, haur bakoitzeko 50 euro izango da kostua. Halaber, 16 orduko bonuak eskuratu ahal izango dira, 30 euroan.

«Apurka-apurka, zinema-jaialdietara iristen ari da kontziliazioa. Xumeki, haurtzaindegi honekin geure harri-koskorra ekarri nahi izan dugu, garapen sozial bidezkoagoa eta inklusiboagoa bultzatzeko», adierazi du Zinemaldiaren zuzendariak, José Luis Rebordinosek.

«Parenting at Film Festivals elkarteko kideoi poz handia ematen digu Donostia Zinemaldian Puxika Gorria ekimenarekin elkarlanean aritzeak. Gure industrian lana eta familia bateratzeko lagungarria izatea espero dugu, eta gizarteari, oro har, eredu ematea», adierazi dute Parenting at Film Festivals taldeko sortzaileek (Sarah Calderón, Michelle Carey, Aurélie Godet eta Olimpia Pont-Chafer). Irailaren hasieran Zinemaldiaren webgunean jakinaraziko dira gainerako xehetasunak.

Temas

Euskera