Zinema Euskaraz programak 120.000 ikusle izan zituen iaz

Zinema Euskaraz programak 120.000 ikusle izan zituen iaz
Usoz

Zineuskadi elkarteak eta Euskal Irrati Telebistak bien arteko akordioa eguneratu dute; 2018an, 12 film estreinatu ziren euskaraz areto komertzialetan

El Diario Vasco
EL DIARIO VASCODonostia

EiTBren eta Zineuskadiren arteko elkarlanari esker, 2018an 12 film estreinatu ziren euskaraz areto komertzialetan, eta, Zinema Euskaraz programak 120.000 ikusle izan zituen estreinaldiak eta eskoletako zirkuituak gehituta.

Gainera, iaz, 7.592 kidek hartu zuten parte HIRU3ren zozketetan, hau da, aurreko urtean baino 1.000 kide gehiagok. Zineuskadik eta EiTBk bien arteko akordioa eguneratu dute, gazteenek euskarazko zinemaren aldeko lanean jarraitzeko. Akordioari esker, HIRU3 haur komunitateko kideek hainbat abantaila izango dituzte 2019an Zinema Euskaraz programaren bitartez antolatzen diren estreinaldietan parte hartzeko.

Horrela, aurten ere, bide beretik jarraituta, txikienentzako estreinaldi bereziak, Zinegabonak egitasmoa eta ekitaldi berritzaile gehiago jarriko dituzte martxan.

Halaber, Tinko euskara elkarteak zortzi film eskaini zituen 2018an, adinaren arabera sailkatuta: 'Grufaloa' (3-5 urte), 'Koko Dragoi Txikia' (3-5 urte), 'Albert' (6-8 urte), 'Luke & Lucy' (6-8 urte), 'Asterix & Obelix' (9-11 urte), 'Tarzan' (9-11 urte), 'Pan' (12-14 urte) eta 'Pikadero' (15-16 urte). Guztira 73.278 ikusle izan ziren 314 emanalditan, eta 43 udalerri eta 297 ikastetxek hartu zuten parte. Gainera, Irudi Biziak elkarteari esker, 5.562 ikaslek 'Aurora' filma ikusteko aukera izan zuten.

Bestalde, 'Pokemon Pikachu Detektibea' filma estreinatu dute ostiralean, maiatzaren 10ean, Araba, Bizkai, Gipuzkoa eta Nafarroako zinema aretoetan. Istorioa Harry Goodman detektibea desagertzen denean hasten da, Tim bere 21 urteko semea gertatutakoa ikertzera behartzen baitu. Pikachu detektibeak, Harryren Pokemon bikotekideak, ikerketarekinlagunduko dio.

Usurbe antzokia (Beasain), Antiguo Berri (Donostia), Niessen (Errenteria), Zugaza (Durango), Meatzari (Muskiz), Getxo Zinema, Max Ocio (Barakaldo), Multicines (Bilbo), Golem Alhondiga (Bilbo), Golem Morea (Iruñea) eta Florida (Gasteiz) zinema aretoetan estreinatuko da 'Pokemon Pikachu Detektibea'.

Temas

Euskera