Urdiñarbeko gazteak arduratuko dira Zuberoako maskarada emateaz

2017ko maiatzean, Zuberoako Pettarra eskualdeko sei herritako gazteek emandako maskarada Aitzondo bailarara heldu zen. Argazkia Larraulen egina da./NUÑEZ
2017ko maiatzean, Zuberoako Pettarra eskualdeko sei herritako gazteek emandako maskarada Aitzondo bailarara heldu zen. Argazkia Larraulen egina da. / NUÑEZ

Herrian eskaini zuten aurreneko emanaldia joan den igandean, eta beste 15 eskainiko dituzte apirilean ondoko Muskildin amaitu arte

Urdiñarbe eta Muskildi elkarren ondoan daude. Zuberoako mendebaldeko udalerriak dira biak, Arbaila eskualdeakoak. 2019ko maskaradaren abiapuntua eta amaiera ere badira. Izan ere, Urdiñarbeko gazteei egokitu zaie aurten maskarada ematea, eta herrian bertan hasi zuten ibilbidea, joan den igandean, urtarrilaren 6an. Bigarren saioa igande honetan izango da, eta aurrera jarraituko du, beste hamalau agerraldi burutuz, Zuberoako inauteriak, Muskildin amaitu arte.

Izan ere, apirilaren 21ean Urdiñarben azken saioa egin aurretik, honako herri hauetan emango da maskarada: Ürrüstoi Larrabilen igande honetan (urtarrilaren 13an); Altzürükün (20an); Lexantzün (otsailaren 27an); Mendikotan (otsailaren 3an); Eskiulan (10ean); Pagolan (17an); Maulen (23an); Barkoxen (martxoaren 3an); Idauze-Mendin (10ean); Garindainen (17an); Larrainen (24an); Alozen (30ean); Hokin (apirilaren 7an); Muskildin (14an) eta, azkenik, apirilaren 21ean, Muskildin.

Herri horietan guztietan 50 arizale baino gehiago ariko dira Xiberoko maskaradaren aspaldiko tradizioa biziberritzen. Ohi denez, bi taldetan banatuta: Gorri dotoreak, dantzari finak, eta Beltzak, basati eta baldarragoak.

Zatiak ere bi izaten ditu dantza, kaleko antzerkia eta inauterian gauzatzen diren aspaldiko errituak uztartzen dituen maskaradak. Hala, goizeko 10:00etan barrikadak muntzatzen dituzte, eta maskarada bera arratsaldeko 15:00ak aldera ematen dute. Garai batean barrikadak benetako oztopo izaten ziren, eta maskaradako partaideek gainditu egin behar izaten zituzten herrira sartzeko. Gaur egun jartzen zaizkien trabak arinagoak izan ohi dira.

Temas

Euskera
 

Fotos

Vídeos