Tolosatik Nafarroara, Azpirotz mendatean gora, 'Errepide galduak' saioan

Tolosatik Nafarroara, Azpirotz mendatean gora, 'Errepide galduak' saioan
ETB

Ander Izagirrek Tolosan hasi eta Leitzan amaituko du osteguneko ibilbidea, bidean topatuko dituen hainbat istorio bitxi ezagutuz

Kirolaren muina ez da irabaztea, txapelak edo kopak altxatzea. Esentzia, mugak gainditzea da. Hortaz asko dakite Tolosan, eta kirolari hauen atzetik ibiliko da Ander Izagirre osteguneko 'Errepide Galduak' saioan.

Elurrik ez dute, baina eskiatzaileak dira XX. mende hasieran noruegiar batzuk eskia ekarri zutenetik herrira. Itsasorik ez dute, baina Kontxako estropadan parte hartu dute bertako traineruarekin. Oztopoak bere lan tresna bilakatu dituen Irene Caminosekin trial egingo du Anderrek eta gainera, kondaira sinestezin bat egia den edo ez argitu nahiko du: hartz bati borrokan aurre egin zion gizonaren historia.

Ondoren, Tolosatik Nafarroara joango da, Azpirotz mendatean gora, Araitz bailarara. Bertan, Anduezako jauntxoak behartuta bailarako 400 gazte eraman ostean, izan ziren istiluak eta sorginkeria salaketen inguruan ikerketa egingo du Anderrek.

Horrez gain, zinemaren historian izan den zuzendari ospetsuenetako batek inguru horretan utzitako arrastoari jarraituko diote. Izan ere, Orson Welles zinemagileak Lekunberrin grabatu zuen Chimes at midnight filmaren parte asko.

Azkenik, Plazaola trenaren bideari jarraika, Leitzan bukatuko dute ibilbidea, baserri bitxi baten historia ezagutuz.

'Errepide Galduak' ostegun honetan izango da ikusgai 22:30ean ETB1en.

Temas

Euskera
 

Fotos

Vídeos