Lau T'erdiko Txapelketako finala, igandean

Bi finalistak, materialaren aukeraketan./MICHELENA
Bi finalistak, materialaren aukeraketan. / MICHELENA

Altuna III.aren eta Ezkurdiaren arteko partida amaitu ostean, saio berezi bat egingo da Navarra Arenatik, finalak eman duena aztertzeko

Euskal Telebistak zuzenean eskainiko du Jokin Altunak eta Joseba Ezkurdiak igandean Iruñean jokatuko duten Lau T'erdiko Txapelketako finala. 17:00etan hasiko den pilota emankizuna saio berezi batekin amaituko da, Navarra Arenatik bertatik egingo dena, finalak eman duena aztertzeko.

Pedro Mari Goikoetxeak gidatuko du mahai-ingurua eta hiru gonbidatu izango ditu: Abel Barriola, Mikel Idoate eta Juan Mari Juaristi Atano XIII.a. Euren iritziekin eta tantorik onenak erakutsiz, partidaren analisia egingo dute. Halaber, bi protagonisten hitzak jasoko dituzte.

Finaleko emanaldien medio ugariak aprobetxatuz, ETBko lan-taldeak egun handi honen inguruko xehetasun guztiak ekarriko dizkigu. Elena Azpeitia eta Xabier Andueza kazetariek frontoiko testigantzak bilduko dituzte zuzenean. Halaber, bi finalisten herrietan, Amezketan eta Arbizun, ere egongo dira kazetariak, bertan gertatzen dena kontatzeko.

Xabier Euzkitzek egingo du igandeko final handiaren kontakizuna, Joxean Tolosak lagunduta. Partida nagusiaren aurretik, Artola-Albisu eta Irribarria-Zabaleta bikoteak izango dira nor baino nor gehiago.

Bera-Beraren partida, eguerdian

Bera-Bera eta Dunaujvarosen arteko eskubaloi norgehiagokarekin hasiko da igandeko kirol-eskaintza. Jon Ander Gorospek eta Matxalen Ziarsolok egingo dute EHF Kopako norgehiagokaren zuzeneko kontakizuna Donostiatik 12:00etatik aurrera.

16:00etan harrijasotzaileak izango dira protagonista. Ibon Gaztañazpi eta Juan Jose Unanue Goenatxo-k iragan abuztuaren 11n Laukizen jokatutako Euskal Herriko Harri Txikien Txapelketaren berri emango dute.

Temas

Euskera
 

Fotos

Vídeos