Patxi Alonso eta Lur Errekondo izango dira aurkezleak
El Conquistador del Fin del Mundo saio oinarrietara itzuliko da urteurren berezian, besteak beste, Jose Luis Korta eta Juanito Oiarzabal kapitain historikoekin
DV
Ostirala, 5 urtarrila 2024, 16:07
Atzera kontaketa abian da muturreko abentura eskaintzen duen 'El Conquistador del Fin del Mundo' saioaren edizio berriari hasiera emateko. Aurten, hastapenetara itzuliko da, Argentinako Patagonian bere 20. urteurrena ospatzeko, eta, nola ez, Ushuaian, Beagleko kanaleko ur hotzetan, Munduaren Amaierako Itsasargi mitikoan jokatuko den finalarekin.
Oraingo honetan, Lur Errekondok eta Patxi Alonsok gidatuko dituzte konkistatzaile izateko hautagaiak, abenturarik gogorrenean. Errekondok iazko esperientzia errepikatuko du, baina oraingoan Karibe atzean utziko du baldintza gogorragoei aurre egiteko.
Horretaz gain, zaleen artean ikusmina sortu du Jose Luis Korta eta Juanito Oiarzabal kapitain historikoen itzulerak. Bi hamarkada geroago, bikote ikonikoa Patagonian izango da berriz, taldeetan ordena jartzeko. Kortaren eta Juanito «berdaderoaren» eskutik, une historikoak berpiztuko dira programa hasieratik jarraitzen dutenen gozamenerako.
EITBtik aurreratu dutenez «edizio berriak ez du inor epel utziko». Besteak beste ur izoztuetan igeri egitea, mendi malkartsuak eskalatzea, zero azpiko tenperaturak jasatea, ibaiaren korronte azkarrari aurre egitea, janaria, ura eta indarrak dosifikatzea dira muturreko abentura honetan bizirik irauteko gakoetako batzuk.
Horrenbestez, gaitasun fisikoa, ikaskideekiko bizikidetza, eta hotzarekiko eta gosearekiko erresistentzia funtsezkoak izango dira munduaren amaierarako benetako konkistatzaile bihurtzeko, eta parte-hartzaile gutxi batzuek baino ez dute titulu hori izateko ohorea.
