Markel Iriziar txirrindularia protagonista, 'Bizipoz, bakarra eta errepikaezina' erreportajean

Ibilbide profesionala utzi aurreko uneak eta bere alderik pertsonalena ezagutuko dituzte

Ostegun honetan, abuztuaren 8an, Markel Irizar txirrindulariari buruzko 'Bizipoz, bakarra eta errepikaezina' erreportajea eskainiko dute ETB1ek eta eitb.eus-ek, 22:15ean. Saioak Oñatiko txirrindulariaren 16 urteko ibilbide profesionala errepasatuko du, eta bere alderik pertsonalena ezagutuko du, senideen eskutik.

Izan ere, Markel Irizarren talderik maitatuena bere familia da. Etxekoek protagonismo handia izango dute erreportaje osoan zehar: haren emazteak, hiru semeek eta amak txirrindulariaren alderdi pertsonalena erakutsiko dute. Halaber, bizipoz lelopean zer-nolako baloreak transmititu nahi izan dituen barneratzeko parada izango du saioak.

Irizarrek aurreko larunbatean, abuztuaren 3an, utzi zuen bere ibilbide profesionala, Donostiako Klasikoan, eta Euskal Telebistak gertutik jarraitu zituen azken ordu horiek. Emozioz beteriko uneak izan ziren Markelentzat. Agur esan aurreko momentuetan izan zen Euskal Telebista berarekin, eta, besteak beste, azken gaua eta taldekideekin egindako azken gosaria nolakoak izan ziren erakutsiko du erreportajeak. Halaber, txirrindulariek goi mailako lehia nola bizi duten ikusiko da.

Horrez gain, Oñatin egin zioten omenaldia ere gertutik jarraitu zuen Euskal Telebistak, eta horren gertuko txirrindulari eta taldekideek Markelekin igarotako urteak nola gogoratzen dituzten azalduko dute.

Emozioak, une gozoak eta bizitzaren inguruko irakaspenak nahasiko dira erreportajea osoan zehar. Irria eta umorea galdu gabe bizitza gogor bati nola aurre egin erakutsiko digu Markelek.