Juanjo Olasagarre idazlea, 'Arte[faktua]' saioan

Olasagarre joan den apirilean, Xabier Lete Saria jaso zuen egunean./USOZ
Olasagarre joan den apirilean, Xabier Lete Saria jaso zuen egunean. / USOZ

'Ia hemen' lan sarituaren inguruan eta bere ibilbide pertsonal eta literarioaz arituko da. Bere gonbidatua Ibon Egaña izango da

Juanjo Olasagarre poeta, azkeneko Xabier Lete Poesia Saria jasotakoa, da aste honetako gonbidatu nagusia 'Arte[faktua]' saioan. Saritutako lana Ia hemen da eta bertan benekotasunetik idatzitako ia 50 bat poema biltzen ditu. 'Arte[faktua]' Bilbon, bere bizilekuan, elkartu da berarekin, saritutako lanaz eta bere ibilbide pertsonal eta literarioaz hitz egiteko.

Olasagarre arbizuarra da, eta psikologia ikasi zuen Donostian, euskarazko lehen promozioan. Lizentziatu ondoren, irakaskuntzan egin du lan, Hizkuntza eta Literatura alorretan. 80ko hamarkadan, euskara irakasle izan zen hainbat euskaltegitan. Artikulugile legez, Egin, Egunkaria, Berria eta Deian argitaratu ditu bere idatziak eta egun ETBko 'Egun on Euskadi' informazio saioan parte hartzen du.

Bere gonbidatua, Ibon Egaña, literatur kritikari eta aditu urnietarra da. Euskal Filologian lizentziaduna, Donostiako Magisteritza Eskolako irakaslea da. 2015ean, Arte eta Gizarte Zientzietan euskarazko tesi onenaren saria jaso zuen. Lan horretan, azken 30 urteetako 2.300 literatur kritika aztertu zituen eta Izen gabe denaz liburuan jaso zituen.

Horrez gain, Maite Martínez de Arenaza (La Taller) artista bilbotarrak bere 'apalategi'ko liburu kuttunak zeintzuk diren azalduko digu.

Zangozako Paula Ayesa, Ainara Lahera, Iraia Sola gazteek Nur abentura liburuaren inguruko booktuberra egin dute. Galdetegian Eneko Bidegain, Pako Sudupe eta Elixabete Garmendia idazleek euren liburu kuttunez hitz egingo dute.

Bukatzeko, irakurlearen tartean Lekeitioko Fabiola Molinuevok, Nora ez dakizun hori, Irati Jimenezen liburuaren gomendioa egingo du.

'Arte[faktua]' larunbat honetan izango da ikusgai 15:00etatik aurrera ETB1en eta eitb.eues-en.

Temas

Euskera