Hondarribiko Bandera zuzenean ikusi ahalko da

Horrez gain, Igeldoko Harria eta Bastidako pilota jaialdia izango dira ikusgai

Igande honetan, Hondarribiako bandera eskainiko dute ETB1ek eta eitb.eus-ek zuzenean, 11:30etik aurrera. Mikel Olazabalek, Ibon Gaztañazpik eta Sara Gandarak egingo dute Euskotren eta Eusko Label ligen estropaden emanaldiaren kontakizuna.

Ondoren, 15:45etan, bezperan Donostian jokatutako Igeldoko Harria harri-jasotzaileen proba izango da ikusgai. Kirol emanaldiekin amaitzeko, Bastidako pilota jaialdia eskainiko dute ETB1ek eta eitb.eus-ek arratsaldeko 17:00etan.

Bakaikoa- Salaverri eta Zabala- Ruiz bikoteek jokatuko dute atariko partida, eta Irribarria- Rezusta eta Urrutikoetxea- Mariezkurrena II bikoteen artekoa izango da partida nagusia. Xabier Euzkitzek, Joxan Tolosak eta Elena Azpeitiak egingo dute emanaldiaren kontakizuna.

Igande honetan, gainera, Agustin Ezenarrok eta Izaro Iraetak Eneko Goia Donostiako alkatea izango dute gonbidatu, Kotxako pasealekuan zuzenean, 'Donostiako Aste Nagusia 2019' saioan. Ondoren, Twin Melody ahizpek disko berria aurkeztuko dute.

Horrez gain, Iñigo Agirrek goitibeheren jaitsieraren inguruko erreportajea eskainiko du eta Jaione Carpintero kazetaria, Donostiako Piraten ordezkariekin egongo da zuzenean.

Igandean, Ciels de Fête su-etxe frantziarraren ikuskizuna eskainiko du saioak zuzenean. 'Donostiako Astea Nagusia 2019' igande honetan izango da ikusgai 22:15etik aurrera ETB1en eta eitb.eus-en.