'Euskaraldia: bat eta bat hamaika' saioaren bigarren atala

Saioko irudi bat./ETB
Saioko irudi bat. / ETB

Toti Martinez de Lezea idazleak, Iñaki Perurena harri-jasotzaileak eta Iñaki Salvador musikariak hartuko dute parte, besteak beste

Euskaraldia abian den honetan, ETB1ek 'Euskaraldia: bat eta bat hamaika' saioaren bigarren atala eskainiko du astelehenen honetan, 22:30etik aurrera. Edurne Azkaratek Euskaraldiaren xehetasunak ezagutarazteaz gain, bere Hamaikakoa osatzen jarraituko du Euskal Herri osoan barrena bidaiatuz.

Tartean, aurpegi ezagun asko bisitatuko ditu, besteak beste, Toti Martinez de Lezea idazlea, Iñaki Perurena harri-jasotzailea eta Iñaki Salvador musikaria. Euskaraldia nola bizi duten kontatzeaz gain, euskararekin duten lotura berezia ere azalduko diote.

Edurne Azkaratek bestelako historiak ere bilduko ditu: Manu Bendala andaluziarrarena, adibidez. Duela zortzi urte Sevillatik Euskal Herrira etorri, euskara ikasi, eta Arabako Bertsolari Txapelketan kantatu berri du inguruko guztien harridurarako.

Azpimarratzekoa da Titty Thusberg finlandiarraren kasua ere. Moda diseinatzaile hau duela 20 urte etorri zen Euskal Herrira, eta gaur egun euskaraz bizi da Donostiako Egia auzoan.

Horrez gain, Arabako Errioxara ere egingo du bisita Azkaratek, eta Euskaraldiaren aitzakian, Ibai Verlaine oiondar gazteak kontatuko dio zein diren euskaraz bizitzeko dituzten ilusio eta zailtasunak.

Hamaikakoa osatzeaz gain, Edurne Azkarate Euskaraldian sartuko da buru-belarri, eta Euskal Herriko hainbat txokotan nola bizi duten ezagutuko du. Ahobizi eta Belarri-prest kontzeptuak Lasarte-Orian asmatu zirela deskubrituko du, Agurainen egin duten mural erraldoian parte hartuko du eta Ipar Euskal Herrian zabaldu zen lehen haur-eskola euskalduneko haurrekin ospatuko du Euskaraldia.

Lehen saioaren arrakastaren ondoren, 'Euskaraldia: bat eta bat hamaika' saioaren bigarren atala, azaroaren 26an emitituko da ETB1en eta eitb.eus-en, 22:30ean hasita.

Temas

Euskera
 

Fotos

Vídeos