'Abordatzera 2019' astelehen honetan, zuzenean

Xabier Sukiak eta Erik Urbietak zuzenean eskainiko dute ekitaldia, eta Maite Eskarmendi eta Odei Esnaola kazetariek portuko eta hondartzako giroa jasoko dute

Piratek Donostia hartuko dute astelehen honetan, eta ETB1ek eta eitb.eus-ek zuzenean eskainiko dute Donostiako Aste Nagusiko ekitaldi ikusgarri hau, 16:15etik aurrera. Xabier Sukia Euskadi Irratiko esatariak eta Erik Urbieta Intxaurrondo auzoko Traganarruak kofradiako kideak egingo dute 'Abordatzera 2019' emanaldiaren kontakizuna.

Halaber, Maite Eskarmendi eta Odei Esnaola kazetariak portuan eta hondartzan izango dira, bertan bizi den giroa bildu eta protagonistak elkarrizketatzeko. Gainera, baltsak portutik nola irten eta Kontxako hondartzara nola iristen diren jasoko du saioak.

Bestalde, piraten txupinazoaren irudiak eskainiko dira eta kofradia eta koadrila ezberdinetako kideekin arituko dira portuan baltsak prestatzen. Gainera, arratsaldeko ekitaldiaren aurreko piraten bazkarian ere izango dira.

Halaber, Miren Arrieta aktorea eta Joseina Etxeberria DJ eta Euskal Irratiko kazetari eta esataria izango dituzte gonbidatu 'Donostiako Aste Nagusia 2019' saioan.

Agustin Ezenarrok eta Izaro Iraetak gainera, Kontxako pasealekutik zuzenean eskainiko dute asteleheneko su-festa, Scarsella su-etxe italiarraren eskutik. Jaione Carpintero kazetaria aldiz, Donostiako Tabakalerako azken solairura igoko da, Prisma aretora, eta bertatik suak nola ikusten diren erakutsiko digu.

Bestalde, Iñigo Agirre gastronomia kontuekin ibiliko da. Zurriolako Street Food Nazioarteko janari dastaketan izango da eta eguna patata tortilla lehiaketan bukatuko du. 'Donostiako Astea Nagusia 2019' astelehen honetan izango da ikusgai 22:15etik aurrera ETB1en eta eitb.eus-en.