Kirol egokituaren munduan barrena, 'Ur Handitan' saioan

Iñigo Llopis igerilari hernaniarra Rioko Jokoetan./
Iñigo Llopis igerilari hernaniarra Rioko Jokoetan.

Urritasun fisiko zein psikologikoak dituzten kirolariak protagonista hartuko ditu saioak, zenbait gipuzkoar tartean direla

EL DIARIO VASCO

'Ur Handitan' saioaren hamargarren atalean kirol egokituaren munduan murgilduko dira. Jaiotzez edo istripu baten ondorioz, urritasun fisiko zein psikologikoa duten kirolarienagana hurbilduko da Xabier Madariaga datorren astean, gainditze bizipenak gertutik ezagutzeko.

Maialen Solaun laudiarra izango da gure protagonista nagusia. 16 urte ditu eta duela hiru urte ikusmena galdu zuen bizikletan izandako istripu baten ondorioz. Pertsona itsu baten bizimodura egokitu behar izan du bere egunerokoa eta besteak beste, 'goalball' deituriko kirolak eman dio aurrera egiteko indarra. Txintxarri bat barnean daraman baloiarekin jokatzen den kirol olinpikoa da. Partida batean egongo da Xabier Madariaga eta bizimodu berrira nola egokitu den ezagutuko du gertutik.

Aitor Frantzesena surf egokituko munduko txapelduna da eta Aritz Aranburu edota Acero anaien entrenatzailea izan da, besteak beste. Hamahiru urterekin galdu zuen lehen begia eta surf istripu batean guztiz itsu gelditu zen. Bere bizipenak kontatuko dizkigu eta taula gainean nola aritzen den erakutsiko du.

Uretatik irten gabe, Iñigo Llopis hernaniarrarekin egongo da saioa Donostian. Igerilaria da bera eta jaiotzez malformazioa du eskuan eta hankan. Haur zelarik hanka hautsi zuen futbolean eta errehabilitazioan zegoela hasi zen igerian. Espainian zein Europan urrezko dominak irabazi ditu, eta Rio-ko para-olinpiar jokoetan egon zen.

Donostian bertan, Jon Alonso karate egokitutako Euskadiko Txapeldunak bere trebeziak erakutsiko ditu kameren aurrean. 23 urte ditu eta down sindromea du.

Beñat Lizaso eta Eneko Sagarmendi, ordea, frontoian aritzen dira. Lehenengoak, istripu batean galdu zuen hanka eta bere bizipenak kontatzeaz gain aulki gurpilduneko paletan nola jokatzen duen erakutsiko du. Bigarrena, adimen urritasuna duen 19 urteko mutrikuarra da eta pasa den urtean Gipuzkoako pala txapelduna bilakatu zen.

Azkenik, Ione Basterra eta Patxi Suarez kirolari gazteekin egongo da 'Ur Handitan'. Biek arantza bifidoa dute. Haur zirenetik jakin dute gaixotasunarekin bizitzen, mugikortasunean oztopoak eragin badizkie ere. Ione Basterrak, 'handbike' egiten du eta Europako txapelduna da bere kategorian. Patxi Suarez, berriz, Bidaideak taldean aritzen da saskibaloi egokituan.

'Ur Handitan' astearte honetan emitituko da 22:15etik aurrera ETB1en.