1993ko Txapelketa Nagusia, 'Hitzetik Hortzera' saioan

Andoni Egaña, 1993an, aurrenekoz txapeldun./MICHELENA
Andoni Egaña, 1993an, aurrenekoz txapeldun. / MICHELENA

Denboran atzera egingo du igandeko saioak, eta 1993ko Euskal Herriko Bertsolari Txapelketa Nagusia ekarriko du gogora. Parte hartu zuten bi emakumeekin eta 1993ko txapeldunarekin izango da Eider

25 urte bete dira aurten 1993ko Euskal Herriko Bertsolari Txapelketa Nagusitik. Beste modu batera esanda, Andoni Egañaren lehen txapeletik edo 40 bertsolaritik 2 emakumek soilik parte hartu zuten txapelketa hartatik. Horien eta beste hainbat datu esanguratsuren berri emango dute igandeko 'Hitzetik Hortzera' programan eta Belodromoko finaleko bertsoaldi onenak entzungo dira.

Programan urte hartara bidaiatuko dute, egon zirenek oroitu dezaten eta egon ez zirenek saioa ezagutzeko. Finalean Andoni Egaña, Xabier Euzkitze, Sebastian Lizaso, Unai Iturriaga, Jokin Sorozabal, Jon Enbeita, Anjel Mari Peñagarikano eta Aritz Lopategi bertsolariek abestu zuten. Gai-jartzaile lanak Laxaro Azkunek eta Bernardo Mandalunizek egin zituzten.

Eider Perez aurkezleak txapelketa hartako artxiboak arakatuko ditu eta, besteak beste, Belodromoan jokatu zen final hartan 11.000 entzule bildu zirela jakingo dugu, goizez eta arratsaldez bi saio izan zirela eta 40 bertsolaritik 2 bakarrik izan zirela emakumeak. Denboran atzera egiteko benetako bidaia egingo dugu eta protagonisten etxeraino joango gara beraien bizipenak biltzera.

1993ko Bertsolari Txapelketan 40 bertsolarik kantatu zuten kanporaketetatik hasi eta finalera bidean. Horietatik 2 bakarrik izan ziren emakumeak: Estitxu Arozena eta Amaia Telletxea. Lesakan beraiekin elkartuko dira eta galdetuko diete nola sentitu ziren ordura arte gizonezkoena zen lur zati hartan sartzean. Arozenak eta Telletxeak bide bat ireki zuten duela 25 urte, baina horrela sentitu ote zuten beraiek?

Autoan sartu eta kostalderantz joango da Eider. Zarautzen zain izango du Belodromoko finalean txapela jantzi zuen bertsolaria: Andoni Egaña. Zarauztarraren hirugarren finala izan zen hura eta jarraian irabaziko zituen lau txapeletan lehenengoa jantzi zuen. Urte horretan zendu zen Lazkao Txiki eta berari eskaini zion bukaerako agurra Egañak. Txapelketan bizitakoari buruz galdetuko diote eta bere ustetan duela 25 urtetik gaur egunera izan diren aldaketak zeintzuk diren ere bai.

'Hitzetik Hortzera' igandero izaten da ikusgai, 15:00etan, ETB1en.

Temas

Euskera
 

Fotos

Vídeos