Sunny Side of the Doc azokaren «balorazio positiboa» egin dute

Dokumentalen nazioarteko azoka egin zen Arroxelen (Akitania Berria) ekainaren 24tik 27ra/Etxepare
Dokumentalen nazioarteko azoka egin zen Arroxelen (Akitania Berria) ekainaren 24tik 27ra / Etxepare

Inoiz baino ordezkari gehiago izan dira aurten azokako Basque Audiovisual euskal ekoiztetxeen standean

DVDonostia

Sunny Side of the Doc dokumentalen nazioarteko azoka egin zen Arroxelen (Akitania Berria) ekainaren 24tik 27ra, eta bertan egindako lanaren «balorazio positiboa» plazaratu dute parte hartu duten euskal ekoiztetxeek. Hain zuzen, Euskal Autonomia Erkidegoko (EAE) hamaika ekoiztetxek, Nafarroako hiruk eta Ipar Euskal Herriko batek parte hartu zuten, Etxepare Euskal Institutuak, Eiken ikus-entzunezkoen euskal klusterrak eta Zineuskadi elkarteak antolatutako Basque Audiovisual standean.

Gainera, Etxepare Euskal Institutuak jakinarazi duenez, inoiz baino ordezkari gehiago izan dira aurten azokako Basque Audiovisual standetik pasa direnak: 23. Ekoiztetxeetako eta erakunde antolatzaileetako kideei gehitu zaie Donostia Zinemaldiaren baitan Ibaia Ikus-entzunezkoen Euskal Ekoizle Burujabeen Elkarteak antolatzen duen Lau Haizetara koprodukzio foroko arduradun Catherine Ulmer.

Horrela, azokan izan diren euskal ekoizle eta zinemagileek bertan bizitakoaren eta lortutako negozio aukeren «balorazio baikorra« egin dute. Hauek dira aurten bertaratu diren ekoiztetxeak: Arena Comunicación, On Produkzioak, Gastibeltza Filmak, Media Attack, Sonora Estudios, Haruru Filmak-Kooperatiba, Komiki Films S.L., Pimpi & Nella Films, Fascina Producciones, Taui Media S.L., Maluta FIlms, Tentazioa Produkzioak, Sincro Producción eta Brisney S.L.

Lan harreman asko landu dituzte euskal ekoiztetxeek azokak iraun dituen egunetan. Esaterako, Fascina Producciones-eko Alfredo Torrescallesek adierazi du «aurretik zehaztutako bilerek eta gauzak inprobisaziorako ez uzteak», denbora gutxian lan gehiago egitea ahalbidetu diela; Pinpi & Nella Films ekoiztetxeko Iratxe Fresneda zinemagileak esan du azokako «decision maker» delakoekin bilera asko egin dituztela; ON Produkzioak ekoiztetxeak ere «Bolante Baten Historia» dokumentala banatzeko kontaktu batzuk lortu dituztela esan du Iban Toledok.

Kontaktuak, akordioak eta esperientzia

Halaber, akordio zehatzetara iritsi gabe ere, «kontaktu interesgarrietara iritsi eta horiekin etorkizunean akordioren bat sinatzeko bideak irekitzeko» aukera izan du Emana Films ekoiztetxeko Miguel Gomezek, besteak beste.

«Ekoiztetxe guztien partetik, dokumentalgintzaren munduko azokarik garrantzitsuena den honetan bizitako esperientzia oso baikorra izan dela jaso dugu», nabarmendu du Etxepare Euskal Institutuko ikus-entzunezko teknikari Alex Aginagaldek.

Ekoizpen etxeen bilerez gain, networking gosari bat antolatu zen Basque Audiovisual standean Celtic Stand-eko kideekin: BBC Alba (Eskoziako telebista Gaelikoa), TG4 (Irlandako Telebista gaelikoa), Ipar Irlandako Telebista eta Gales, Eskozia eta Irlandako bost ekoiztetxek parte hartu zuten topaketan, 11 euskal ekoiztetxerekin batera. Catherine Ulmerrek, tartean, bilera horren balorazio ona egin du: «Ideia bikaina iruditu zait; koprodukzio aukera asko sortu baitira bertan».

Temas

Euskera