Resurreccion Maria Azkueren lanak digitalizatu ditu Euskaltzaindiak

Joan Mari Torrealdai, ekimenaren aurkezpenean /
Joan Mari Torrealdai, ekimenaren aurkezpenean

Guztira, argitaratutako 922 idazlan katalogatu eta digitalizatu dira. Lehen argitalpena 1888koa da, eta azkena 1951koa

Resurreccion Maria Azkuek 64 urtetan argitaratutako lanak bildu eta sareratu ditu Akademiak. Guztira, argitaratutako 922 idazlan katalogatu eta digitalizatu dira. Lehen argitalpena 1888koa da, eta azkena 1951koa. lehen euskaltzainburua izan zen Azkue, eta haren lanak teknologia berrien bitartez gizarteratu nahi izan dituzte.

Andres Urrutia euskaltzainburuak gogoratu duen legez, «Bizkaiko Foru Aldundiak eta Euskaltzaindiak bat egin dute, eta egitasmo honekin Azkue lehen euskaltzainburuaren izena eta izana (bir)gogorarazi nahi dituzte, haren lanak atondu eta teknologia berrien bitartez gizarte osoaren eskura jarriz. Aurrerantzean, haren lan argitaratuak sarean izango dira eta horretarako ezinbestekoa izan da JAKIN Fundazioaren laguntza, berak egin baitu digitalizazio lana eta atonketa».

Bestalde, 'Ardi galdua' eleberria berragitaratu du Euskaltzaindiak Ana Toledo eta Elixabete Perez Gaztelu irakasle eta Euskaltzaindiko kideek egindako argitaraldi eder batez, testua ere orain dela ehun urteko eta gaurko ortografian emanez.

Gainera, Akademiaren artxiboak Azkue zenaren gutunak ere eskaintzen ditu sarean. «Hortxe ikusten da haren izatea eta eitea, lekeitiar unibertsala izan zenaren eskutik», esan du Urrutiak.

Lorea Bilbao Euskara eta Kulturako foru diputatuak ere Azkueren lana goraipatu du: «Bizkaiko Foru Aldundiarentzat, Resurreccion Maria Azkueren lan eskerga, euskararen lurralde eremu osoaren eta euskaldun guztien ondare ezin galduzkoa izanik, eutsi eta zabaldu beharrekoa da, inolako zalantzarik gabe. Gaur aurkezten dugun digitalizazioari esker, bere ekoizpen intelektual-kulturala, ahozkoa zein idatzizkoa, edozein pertsonaren eta, batez ere, datozen belaunaldien esku geldituko da oso-osorik. Aitortza, beraz, Resurreccion Maria Azkueri, esker ona egindako lanari eta, nola ez, eskerrak Euskaltzaindiari ere gaur aurkezten dugun egitasmoa adostu eta aurrera eramateagatik».

Bildutako lehen argitalpena 1888koa da, eta azkena 1951koa. Guztira, argitaratutako 922 idazlan katalogatu eta digitalizatu dira. Idazlanak hamar multzotan sailkatu dira; liburu enblematikoak 32 dira; gainerako liburuak, 54; liburuxkak, 23; liburu zatiak, 27; artikuluak, 742; itzulpenak, 10; berak editatutako beste 5; 8 berrargitalpen; itzulpenak, 12; eta argitaratutako 9 gutun bildu dituzte, besteak beste.

Liburu enblematikoak

Azkueren liburuen artean, lau dira nagusi eta enblematikoak, beren neurri, bikaintasun eta eraginagatik: Diccionario vasco-español-francés, Cancionero popular vasco, Morfología vasca eta Euskalerriaren yakintza. Horrenbestez, bereizita aurkezten dira.

Lau liburu horiek hainbat argitalpen izan dituztenez, edizio kanonikoari eman zaio lehentasuna: Azkue bizi zen artean ateratako azken edizioa hartu da edizio kanonikotzat.

Bestalde, lau liburu hauek hainbat berredizio izan dituzte 60ko eta 80ko hamarkadetan. Berredizio horiek guztiek, edizio kanonikoan agertzen ez diren atal berriak dituzte: sarrerak, hitzaurreak edo bestelako lanak. Testu erantsi horiek ere, Azkuek berak idatzitakoak izan ez arren (bat izan ezik), bere obraren edizioen testuinguruan argitaratu direnez, katalogatu eta digitalizatu egin dira.

Azkueren beste liburu guztiak bi multzotan sailkatu dira, orrialde kopuruaren arabera: gainerako liburuak, eta liburuxkak.

Temas

Euskera