Quebeceko 20 bat ordezkari, kultur elkarlanean sakontzeko

Larraza, Etxepare Institutuko zuzendaria/Jose Usoz
Larraza, Etxepare Institutuko zuzendaria / Jose Usoz

Etxepare Institutuak datorren urtean Quebecen burutuko du aurten Eskozian egiten ari den programa kultural eta artistikoaren antzekoa; esfortzu berezia ari dira egiten eragileak eta erakundeak elkar ezagutu daitezen, eta ikusteko ea elkarlana sustatu daitekeen

El Diario Vasco
EL DIARIO VASCODonostia

Irene Larraza Etxepare Euskal Institutuko zuzendariak iragarri duenez, Quebeceko 20 bat ordezkari Euskal Herrian izango dira uztailaren hasieran, institutuak berak ekarrita, kultur arloko elkarlanean sakontzeko asmoz.

Datorren urtean Quebecen burutuko du Etxepare Institutuak aurten Eskozian egiten ari den programa kultural eta artistikoaren antzekoa, badirelako «herri bezala lotzen gaituzten elementu asko, kultura aldetik, identitate aldetik, kulturarekiko harrotasun aldetik», gogoratu du Larrazak ETB1en egin eta Europa Press berri agentziak jaso duen elkarrizketan.

Horrela, kanpoko kultur eragileak Euskal Herrira ekarri eta euskal kulturaren enbaxadore bihurtzeko «espiritua» Etxepare Institutuak zeharka egiten dituen jarduera askotan dagoela aipatu du, egun burutzen ari den Scotland Goes Basque programan dagoen bezala, eta «batez ere Quebeceko programan» egongo dela azpimarratu du.

«Gurea nahi dugu erakutsi, irakatsi, gure hizkuntza ezagutarazi, baina helburua da horrek balio dezala guk beste kulturekin lortu nahi dugun komunikazio sakonago batean, balio dezala loturak egiteko kanpoan, eta horrek dakar askotan bueltako bidaia bat, era informalago batean edo ondo egituratuta», azaldu du.

Ildo horretan, «bueltako bidaia hori» Eskoziako kasuan egongo dela esan du, hainbat egitasmok «itzulerakoa» izango dutelako, eta datorren urtean Quebecen egingo den programa «oraindik gehiago» egongo direla, «denbora gehixeago izan dugulako hau lantzeko».

«Etxeparek bertan sustatuko dituen leihotxo horietaz gain, esfortzu berezi bat egiten ari gara hemengo eta Quebeceko eragileak eta erakundeak elkar ezagutu daitezen, eta deialdi bat egin dugu berriki, Quebeceko Gobernuak han eta guk hemen, eragileei galdetzeko nork izango lukeen interesa hangoak ezagutzeko eta ikusteko zer dugun komunean eta ea elkarlana sustatu daitekeen. Uztailaren hasieran 20 bat lagun ekarriko ditugu Quebecetik lan horretan sakontzeko«, azaldu du.

Temas

Euskera