Orotariko Euskal Hiztegia berritu eta sareratu dute

Orotariko Euskal Hiztegia berritu eta sareratu dute
Euskaltzaindia

Azpisarreretan, definizioetan edo sarreraren testu osoan bilatu ahal izatea da bilaketarako berrikuntzarik nagusiena

DVDonostia

Orotariko Euskal Hiztegiaren (OEH) bertsio berritua sareratu du Euskaltzaindiak, bi berrikuntza nagusi dituena: hiztegia TEI gidalerroen arabera egituratua eta sareko kontsultarako bide berriak. Orotariko Euskal Hiztegiak 146.134 sarrera eta 56.781 azpisarrera biltzen ditu guztira.

Akademiak jakinarazi duenez, egituratzeari dagokionez, papereko argitalpenaren ikuspegitik TEIn kodetutako sarrera bakoitzaren elementu guztien egituratzera pasatu da (informazio lexikografikoa, adierak, azpiadierak, adibideak, definizioa...), tratamendu informatiko askoz ere aberatsagoa ahalbidetuz.

Azpisarreretan, definizioetan edo sarreraren testu osoan bilatu ahal izatea da bilaketarako berrikuntzarik nagusiena. Horrekin batera, gainera, karaktere ordezkapenak ere egin daitezke, hitz hasierak zein bukaerak eskatuta, esaterako, bai eta distantziako bilaketak eginda ere. Emaitzetan sarrerari buruzko informazio osagarria eskaintzen da, emaitza hobeto kokatu eta ulertu ahal izateko: laburduren azalpenak, sarreraren egitura edo sarreraren barruan nabigatzeko aukera.

Gainera, adibidetegia ere kontsultagai dago. Orotariko Euskal Hiztegiaren balio handienetako bat sarrerak dokumentatzeko erabili diren adibideak dira, ia corpus gisa erabil daitezkeenak. Orain, adibide horien bilaketa aurreratua egin daiteke, emaitzak mendearen, euskalkiaren, obraren edota egilearen arabera iragazita, hala nahi bada. Forma baten erabilera idatzi historikoa aztertzeko bide ezin hobea da hau. Hiztegia lantzeko ingurunea ere garatu da, zuzenketak eta osatze-lanak egin ahal izateko, etengabe eguneratuko baita; alegia, ez da lan bukatua.

Orotariko Euskal Hiztegiak euskararen aro eta euskalki guztietako lexikoa jasotzen du. 1987an argitaratu zen paperean lehen liburukia eta 2005ean hamaseigarrena eta azkena. Euskaltzaindiak sarean jarri berri duena hiztegiaren oinarrizko bertsio elektronikoaren seigarren argitaraldia da, eta urrats berri bat, 146.134 sarrera eta 56.781 azpisarrera biltzen dituena.

Temas

Euskera