Getxon abiatu da Euskal Herriko jazz zirkuitua

Charenée Wade New Yorkeko abeslaria./chareneewade.com
Charenée Wade New Yorkeko abeslaria. / chareneewade.com

Getxoko 42. Nazioarteko Jazzaldia Charenée Wade abeslariak irekiko du

Euskadiko jazz zirkuitua asteazken honetan hasiko da, uztailaren 4an, Getxoko 42. Nazioarteko Jazzaldiarekin. Bost egunez, izen handiko artistak eta musikari gazteak bilduko dira Bizkaiko udalerrian 21 kontzertu eskaintzeko. Lehenengo egunean Charenée Wade abeslari estatubatuarraren saioa izango da Biotz Alai Abesbatza plazan, 22.00etan. Jazz eszenan azken urteotan sortutako ahots onenetarikoa dauka kantari estatubatuarrak, antolatzaileek nabarmendu dutenez.

Eguneko egitarauan beste bi saio egongo dira. Horrela, Talde Lehiaketan Pepe Zaragoza Quintet ariko da, Biotz Alai Abesbatza plazan, 21.00etan, eta Hirugarren Milurtekoa atalean M.A.P. hirukotea, Algortako Geltokia plazan, 19.00etan, Getxoko Kultur Etxeak jakinarazi duenez.

Antolakuntzaren arabera, Charenée Wade kantari, konpositore eta moldatzaileak «jazz eszenako etorkizun handiko artista» dela erakutsi du azken urteotan. Carnegie Hall-en Dianne Reeves-en musikari tailerrean parte hartzeko hautatu ziren lau talentu gazteetako bat izan zen, eta lehenengo finalista izan zen Thelonious Monk Nazioarteko Ahots Lehiaketan. Halaber, Betty Carter-en Jazz Ahead Program ekimen ospetsuan parte hartzeko hautatu zuten (Kennedy Center, Washington).

2011. urtean hasi zuen bere ibilbide diskografikoa, «Love Walked In» lanarekin, eta 2015ean argitaratu zuen «The Offering», Gil Scott-Heron eta Brian Jackson-en musikari eginiko omenaldi berritzailea eta abangoardiazkoa. Une honetan bere hirugarren lanaren grabaketa prestatzen ari da, abesti originalez erabat osatuta egongo dena.

Bestalde, Talde Lehiaketan Alacanteko Pepe Zaragoza tronpeta jotzaile eta konpositorea ariko da, boskote formatuan. Gaur egun Valentziako jazz musikari gazteenen artean izenik esanguratsuenetakoa da eta «La plaça dels somnis» bere lehen lanarekin kritika onak jaso ditu Estatu mailan.

Halaber, Hirugarren Milurtekoa atalean, M.A.P. hirukote katalana ariko da. Proiektu berritzaile horren bitartez doinu eta estilo zabalduak erritmo akademikoekin uztartzen dira, betiere inprobisazioaren aldeko apustua eginda.

Temas

Euskera

Contenido Patrocinado

Fotos

Vídeos