Asgarth taldeak 'Kale gorrian' aurkeztu du
Añorgako taldeak urtarrilean abiatu zuten aro berria 2007an agur esan ostean
j. agirre
Asteazkena, 23 azaroa 2022, 12:10
Asgarth talde añorgatarrak 'Kale Gorrian' abesti berria aurkeztu du, kaleratutako azken diskoaren bigarrena. Boskotea etxerik gabekoen bizitzan murgildu da, kalean gau eta egun bizi direnen errealitatean.
'Zeldatik' diskoa Usurbilgo Haritz Harreguy estudioetan grabatu da eta abenduaren 2an argitaratuko da. Asgarthen bosgarren diskoa da, 17 urteko lehena. Hamaika abesti berri hauetan, taldea bere sustraietara itzuli da, estilo klasikora, boskote berritu batekin eta soinu indartu batekin. Abestiak konfinamendu garaian konposatu dira, etxeko gelatik, eta hitzak gizarte gaiei eta maitasunari buruzkoak dira.
2007an agur esan zuen toki berdinean itzuli zen Asgarth taldea, Añorgako (Donostia) zinema zaharrean, etxean. Aro eta disko berriari hasiera emateko kontzertua urtarrilaren 15ean eskaini zuten. Aurkeztutako lehen singlea 'Zeldatik' abestia izan zen eta orain bigarrena plazaratu dute, 'Kale Gorrian'.
Donostiarrek azaldu dutenez «abesti honekin taldea sustraietara itzuli da, estilo klasikora, eta gainerako abestiak ere lehen diskoekin lotuago egongo dira, duela 16 urte kaleratu genuen Garrasia lanarekin baino. Aldi berean, gure soinua berritu dugu eta kide berriek horretan lagundu dute. Denok konfinatuta egon garen garaiotan, disko berria etxetik egindako lana izan da, ziegatik. Argi izpi bat aurkitu nahian, abestiek gai sozialak eta maitasunarekin lotutakoak jorratuko dituzte».
Asgarth taldea
-
Ahotsa: Asier Enbil.
-
Gitarra: Ander Cañas.
-
Gitarra: Unai Zabala.
-
Bajua: Mikel Yarza.
-
Bateria: Etxahun Urkizu.
Urtarrilaren 15ean Añorgako zinema zaharrean eskainiko duten kontzertuaren zein ostean etorriko direnen sarreren salmentari buruzko informazioa datozen egunetan emango dute ezagutzera sare sozialen bidez.
Añorgako heavy metal taldeak Euskadi Gazteko IX. Maketa Lehiaketan entzuleen saria irabazita hasi zuen bere ibilbidea. Gerora etorri ziren 'Jainkoen egoitza' (1999), 'Etorkizunaren sustraia' (2001), 'III' (2002) eta 'Garrasia' (2005). Lehenarekin kontzertu asko eskaintzeko aukera izan zuten eta bigarrenak taldearen oihartzuna eta sona sendotu zuen. Guztira, 2000 eta 2001 artean 60 kontzertutik gora eman zituzten. Azken biek bestelako harrera izan zuten eta «sugarra» itzali ahala, taldeak banatzea erabaki zuen 2007an. 2020an bi taldekide berri gehituta taldeak bere itzulera jakinarazi zuen.
