«Barruan daramagun ni horrentzako estimulua da saria»

Benito Lertxundi bere herrian, Orion./
Benito Lertxundi bere herrian, Orion.

Gipuzkoako Foru Aldundiak 'Orioko bardoari' emango dio Urrezko Domina, bere «ibilbide luze eta emankorragatik»

FELIX IBARGUTXIDONOSTIA.

Gipuzkoako Foru Aldundiak Benito Lertxundi kantari eta konpositoreari emango dio aurten Urrezko Domina, ekainaren 12an Foru Jauregian egingo den ekitaldian. Halaber, Urrezko Plaka bi emango ditu. Alde batetik, frankismoaren garaiko Ordena Publikoaren Auzitegiaren bortizkeria eta errepresioa jasan zituzten emakumeek jasoko dute plaka bat, eta Beroa, Gipuzkoako Harrera Familien Elkarteak bestea.

Urrezko Domina jasoko duen Benito Lertxundiren ibilbide artistikoa «luzea eta emankorra» da, Foru Aldundiko Larraitz Ugarte bozeramaileak adierazi duenez, eta gaineratu kantuen bidez, mezu poetikoak eta, aldi berean, politikoak bidali izan dituela «errepresioaren menpean zegoen euskal gizarteari».

Larraitz Ugarte foru gobernuko bozeramaileak gogorarazi duenez, «euskal kantagintzaren sortzailerik handienetakoa da», eta edozein korronte eta modaren gainetik biziraun dute bere doinuek hainbat hamarkadatan.

Ez Dok Amairu kultur mugimendu garrantzitsuaren kideetako bat izan zen Benito Lertxundi (Orio, 1942). 1971ean eman zuen argitara lehen disko luzea, 'Benito Lertxundi' zeritzana.

-Nola hartu duzu errekonozimendu hau?

-Lehenxeago edo beranduxeago, badakizu, urte asko daramazu honetan eta badakizu etorrizko zaizkizula sarien eskaintzekin. Lehendik ere badugu horretan esperientzia. Egia da sari oso sari garrantzitsua dela.

-Jakina.

-Askotan aipatzen ari naiz guk barruan daramagun ni horrentzako estimulua da. Baina, esango nuke -lehen ere ikusia naizelako- asko pozten direla jarraitzen gaituztenak. Batzuk hunkitu ere egiten dira, eta sentitzen dira parte balira bezala, eta errealizatuak baleude bezala. Gainera, egia da. Sari hau, puska handi batean, beraiena da; jarrai-tzaileena, alegia. Eta horiengatik asko pozten naiz.

-Zer moduz zabiltza lan aldetik? Badituzu kontzertuak han eta hemen, martxa normalean ari zara...

-Bai, martxa normalean ari naiz, baina oraingo normaltasunak ez dauka zer ikusirik garai batekoarekin. Gauzak asko murriztu dira. Ez dakit nola esan, kuriosoa da, arraroa eta paradoxikoa: geronek produzitutako jaialdietarako ere askotan zailtasunak ipintzen dizkigute toki piska bat izango duen aretoa uzteko garaian. Halako nagitasun edo nagikera bat sumatzen dut gizartean. Baina ari gara kontzertuak egiten, bai. Lehengo larunbatean Hazparnen izan ginen, eta oso ongi joan zen. Orion ere duela gutxi egin dugu, eta laster Andoainen izango gara. Badaude beste kontzertu ba-tzuk erortzear, eta hor ari gara, bultzada ematen.

-Ari al zara konposizio-lanetan?

-Bai, baina mantso-mantso. Momentu honetan, egia esan, letrak osatzen ari naiz. Zeozer egiten dut, hurrengo egunean aldatu egiten dut, edo uzten dut eta handik bi astera aldaketa bat egiten diot... Badakizu: bidea egiten, inolako presarik gabe.